მოსწავლის შეფასების რომელი ფორმა აირჩიეს ახალციხის სკოლებში

განათლების ანტიკრიზისული გეგმის წარდგენისას, მინისტრმა მიხეილ ჩხენკელმა განმარტა, რომ მოსწავლეების შესაფასებლად ორი ფორმა შემუშავდა, მათგან სასურველი თავად სკოლამ უნდა აარჩიოს.

სამინისტროს რეკომენდაციების მიხედვით, შეფასების ფორმები ასე გამოიყურება:

- ფორმა N1 - მოსწავლის 2019-2020 სასწავლო წლის წლიურ ქულად განისაზღვრება მოსწავლის მიერ პირველ სემესტრში მიღებული ქულა;

- ფორმა N2 - მოსწავლის 2019-20 სასწავლო წლის წლიურ ქულად განისაზღვრება მოსწავლის მიერ პირველი სემესტრის ქულისა და მეორე სემესტრის, ექვსი კვირის განმავლობაში (ეს ექვსი კვირა პანდემიამდე) გავლილი პროგრამისა და დისტანციური სწავლების პროცესში მიღებული ცოდნის შეფასების საფუძველზე.

ქალაქ ახალციხის სკოლების უმრავლესობაში უპირატესობა შეფასების მეორე ფორმას მიენიჭა. ანუ მოსწავლეები მთელი წლის განმავლობაში მიღებული ცოდნის მიხედვით შეფასდებიან.

გადაწყვეტილება სკოლებში პედაგოგიური საბჭოების ჩატარების შემდეგ მიიღეს.

„ნამდვლად არ გვქონდა იმის შესაძლებობა, რომ უგულვებელგვეყო მეორე სემესტრი. პირველი სემესტრის შედეგები კი ობიექტური იყო, მაგრამ დიდი შრომა ჩადეს ბავშვებმაც და მასწავლებლებმაც ამ დისტანციური სწავლების დროს. ვთვლით, რომ ნაყოფიერი იყო“, - გვითხრა მეხუთე საჯარო სკოლის დირექტორმა ინგა ვარდიძემ.

დღეს, 19 მაისს, 12:00 საათზე ამ საკითხზე პედსაბჭო ახალციხის პირველ სკოლაშიც ჩაატარეს. გადაწყდა, რომ შეფასება აქაც მეორე ფორმის მიხედვით მოხდება.

„მივიღეთ რეკომენდაციები სამინისტროსგან და მეორე ფორმა ავირჩიეთ. ჩვენთანაც ჩვეულებრივად მიმდინარეობდა დისტანციური სწავლება და თუ რამე ხარვეზი იყო ვცდილობდით გამოსწორებას. მაგალითად, ერთ სოციალურად დაუცველ მოსწავლეს მობილურიც შევუძინეთ, რომ ხელი არ შეშლოდა სწავლაში. თუ მოსწავლე სოფელში იყო, მაშინ ტელეფონით ვეკონტაქტებოდით. მშობლებიც ჩართულები იყვნენ“, - თქვა პირველი სკოლის დირექტორმა ჟუჟუნა გოგოლაურმა.

შეფასების მეორე ფორმა აირჩიეს ახალციხის მესამე საჯარო და კერძო სკოლა „მზექაშიც“.

„მარტო პირველი სემესტრის მიხედვით დაწერ ქულას, ეგრე უფრო იოლია, მაგრამ არის შესაძლებლობა, რომ ქულა აუმაღლდეთ და არ მინდა ბავშვს ნიშანი დაეკარგოს“, - განმარტეს კერძო სკოლა „მზექაში“.



‘მოსწავლე ქულას კომპლექსური დავალების საშუალებით აიმაღლებს’

[მარიამ ბარძიმაძე, ახალციხე]