ქალაქ ახალციხის სკოლებში 387 პირველკლასელი მივიდა [ფოტო]

ქალაქ ახალციხის ექვს საჯარო სკოლასა და კერძო სკოლა „მზექაში“ დღეს პირველი ზარი 387 პირველკლასელისთვის დაირეკა.

ახალი სასწავლო წლის დაწყება, 10:00 საათიდან ყველა სკოლაში სიმღერებით და საცეკვაო ნომრებით აღნიშნეს. პირველ კლასელებმა სკოლის ეზოებში შეკრებილ მასწავლებლებს, მშობლებსა და მოსწავლეებს ლექსები წაუკითხეს.

სკოლის მოსწავლეებს ახალი სასწავლო წლის დაწყება, რესურსცენტრისა და ადგილობრივი თვითმმართველობის პირველმა პირებმა მიულოცეს და პირველკლასელებს საჩუქრად წიგნები გადასცეს.

2019–2020 წლის სასწავლო წელს ქალაქის სკოლებიდან ყველაზე მეტი 116 პირველკლასელი ახალციხის მეხუთე საჯარო სკოლამ მიიღო.

პირველ საჯარო სკოლაში 115 პირველკლასელი მივიდა, მეორე საჯარო სკოლაში 49, მესამე საჯარო სკოლაში 52, მეოთხე საჯარო სკოლაში ოთხი, მეექვსე საჯარო სკოლაში 38, ხოლო კერძო სკოლა „მზექამ“ 13 მოსწავლე მიიღო. განათლების სამინისტროს ინფორმაციით კი სამცხე–ჯავახეთის საჯარო სკოლებში ჯამში 2 158, ხოლო კერძო სკოლებში 17 პირველკლასელი მივიდა.

სასწავლო პროცესი განახლდა, ახალციხის მეორე საჯარო სკოლაშიც, სადაც ჯერ კიდევ შენობის სარეაბილიტაციო სამუშაოები მიმდინარეობს.

დირექტორის ბელა დიასამიძის თქმით, სამშენებლო სამუშაოები საფრთხის შემცველი არ არის და სასწავლო პროცესი ჩვეულებრივად გაგრძელდება.

„უკვე დასრულების ეტაპზეა და უმნიშვნელო სამუშაოები მიმდინარეობს საპირფარეშოების ნაწილში, როცა გაკვეთილები იქნება მუშები აქ არ იქნებიან. ბავშვების უსაფრთხოება დაცული იქნებ", – ამბობს მეორე საჯარო სკოლის დირექტორი ბელა დიასამიძე.

საქართველოს განათლების, მეცნიერების, კულტურისა და სპორტის სამინისტროს ინფორმაციით, ახალი სასწავლო წლისთვის, სრული და ნაწილობრივი რეაბილიტაცია მთელ საქართველოში, 700-მდე სკოლაში განხორციელდა.

სწავლის დაწყება საქართველოს 19 საჯარო სკოლაში გადაიდო, მათ შორის სამცხე–ჯავახეთში ახალქალაქის სოფელ ჩანდურას საჯარო სკოლაში და ადიგენის სოფელ ზარზმის საჯარო სკოლაში. სწავლა სკოლების ნაწილში 30 სექტემბერს, ნაწილში კი 23 სექტემბერს განახლდება. მიზეზი სარეაბილიტაციო სამუშაოებია.









[ლუბა გიორგაძე, მარიამ ბარძიმაძე ახალციხე]