2015 წლის მეორე სემესტრის წარჩინებულ სტუდენტებს მერია ოქტომბრის სტიპენდიას ურიცხავს

სამცხე–ჯავახეთის სახელმწიფო უნივერსიტეტისა და კოლეჯ "ოპიზარის" წარჩინებული სტუდენტები 2014–2015 სასწავლო წლის მეორე სემესტრის ქულების მიხედვით მერიისგან 100 ლარიან სტიპენდიას მიიღებენ. მერიაში ირწმუნებიან, რომ უნივერსიტეტის რვა და კოლეჯის 2 სტუდენტი ერთი სემესტრის სტიპენდიას სრულად მიიღებს.

"მერია ბრძანებას წერს ყოველ თვე, მაგრამ სტიპენდია ინიშნება სემესტრულად, უბრალოდ სასწავლებელს ვუთანხმებთ, რამე ხომ არ შეიცვალა, ან სტუდენტი ხომ არ გადავიდა სხვა უნივერსტეტში და ასე შემდეგ", – განმარტავენ მერიაში.

რაც შეეხება იმას, რომ ოქტომბრის სტიპენდია დეკემბერში ირიცხება, მერიაში ამბობენ, რომ უნივერსიტეტიდან და კოლეჯიდან წარჩინებული სტუდენტების სია ახლა მიიღეს.

შეგახსენებთ, რომ სამცხე–ჯავახეთის სახელმწიფო უნივერსიტეტისა და ქალაქ ახალციხის კოლეჯ "ოპოზარის" წარჩინებულ სტუდენტებს ქალაქის მერიამ სტიპენდია მიმდინარე წლის გაზაფხულზე დაუნიშნა. თუმცა, მაშინ სტუდენტებმა მხოლოდ ორი თვის სტიპენდია მიიღეს, რაც მერიამ სემესტრის დამთავრებით ახსნა.

„სტიპენდია ინიშნება სემესტრულად, და არა წლიურად. ყოველი სემესტრის ბოლოს გადმოგვცემენ სტუდენტების სიას და წარჩინებულ სტუდენტებს ერიცხებათ თანხა. წინა სემესტრში ჩაერიცხათ, პირველი სემესტრის ქულებით“, – განგვიმარტეს მერიაში.

[თამარ თოთაძე, ახალციხე]