როგორ შეფასდებიან სკოლებში მოსწავლეები - სამინისტროს გეგმა

მიხეილ ჩხენკელის განმარტებით, არსებობს შეფასების ორი ფორმა: განმავითარებელი და განსაზღვრული. მათ შორის, განმავითარებელი ფორმა ნიშნავს, როცა მასწავლებელი აღწერს თითოეული მოსწავლის განვითარების დინამიკას სასწავლო წლის განმავლობაში, რაც ხელს უწყობს სწავლის ხარისხის გაუმჯობესებასა და მომდევნო სასწავლო წელს ეფექტიანი საგაკვეთილო პროცესის დაგეგმვის შესაძლებლობას.

განმსაზღვრელი შეფასება კი არის ნიშანი. მინისტრის თქმით, ასეთი შეფასების ორი ფორმა არსებობს და სკოლებს შეუძლიათ თავად აირჩიონ, რომლის მხიედვით უნდა შეაფასონ მოსწავლეები.

- ფორმა N1 - მოსწავლის 2019-2020 სასწავლო წლის წლიურ ქულად განისაზღვრება მოსწავლის მიერ პირველ სემესტრში მიღებული ქულა;

- ფორმა N2 - მოსწავლის 2019-20 სასწავლო წლის წლიურ ქულად განისაზღვრება მოსწავლის მიერ პირველი სემესტრის ქულისა და მეორე სემესტრის, ექვსი კვირის განმავლობაში (ეს ექვსი კვირა პანდემიამდე) გავლილი პროგრამისა და დისტანციური სწავლების პროცესში მიღებული ცოდნის შეფასების საფუძველზე.

„ჩვენ შევიმუშავეთ შეფასების ალტერნატიული გზები და ამავდროულად, გვინდა წავახალისოთ სკოლების ავტონომია და მათი დამოუკიდებლობის ხარისხი აკადემიური მიმართებით. ჩვენ შევთავაზებთ ალტერნატიულ გზებს სკოლებს და მივმართავთ, რომ თვითონ მიიღონ გადაწყვეტილება. ეს გადაწყვეტილება დაფუძნებული იქნება თვითონ ინდივიდუალური მოსწავლის სიტუაციიდან და ზოგადად სკოლის სპეციფიკიდან გამომდინარე“.

მინისტრმა ცალკე საკითხად გამოყო მეხუთე კლასელების შეფასება.

„ცალკე უნდა აღვნიშნოთ მეხუთეკლასელების სიტუაცია. მეხუთეკლასის მოსწავლეთათვის განმსაზღვრელი შეფასება იწყებოდა მეორე სემესტრიდან შესაბამისად, მათი შეფასება მეორე სემესტრის ექვსი კვირის განმავლობაში გავლილი პროგრამისა და დისტანციური სწავლების პროცესში მიღებული ცოდნის საფუძველზე მოხდება“.

ის მოსწავლეები კი, რომლებსაც 2019-2020 სასწავლო წლის პირველ სემესტრში შეფასება არ გააჩნიათ, ამ სასწავლო წლის მეორე სემსტრის ექვსი კვირის განმავლობაში გავლილი პროგრამისა და დისტანციური სწავლების პროცესში მიღებული ცოდნის საფუძველზე შეფასდებიან.
მინისტრმა აღნიშნა, რომ მოსწავლეთა შეფასების გეგმა და რეკომენდაციები უფრო დეტალურად სკოლებსა და რესურსცენტრებს დღეს, 15 მაისს გაეგზავნებათ და სამინისტროს ვებ-გვერდზეც აიტვირთება.

[მარიამ ბარძიმაძე]