როგორია დისტანციური სწავლების გეგმა სკოლებში

სამინისტროს მიერ დამტკიცებული დისტანციური სასწავლო გეგმის მიხედვით:

I-IV კლასების მოსწავლეები დღეში გაკვეთილებზე 1 საათს გაატარებენ;
V-IX კლასების მოსწავლეები 1.5 საათს;
X-XII კლასების მოსწავლეები 2 საათს.

რაც შეეხება თითოეული გაკვეთილის ხანგრძლივობას დისტანციურ რეჟიმში, ასეთი იქნება:
ა) I-IV კლასებში – 15-20 წუთი;
ბ) V-IX კლასებში – 25-30 წუთი;
გ) X-XII კლასებში – 35-40 წუთი.

ამავდროულად, რეკომანდებულია დღეში არაუმეტეს 3 გაკვეთილი.

დოკუმენტის მიხედვით:

- რეკომენდებულია დაგეგმილი გაკვეთილი შეიცავდეს სხვადასხვა ინტერაქტიულ ტექნიკას, მათ შორის, 10-15-წუთიან შესვენებას ფიზიკური აქტივობით. პერიოდულად შეიძლება ჩატარდეს თვალის ვარჯიში, მაგ.: ეკრანიდან მზერის გადატანა შორს მდებარე საგანზე, თვალის 5-6-ჯერ დახამხამება.

- ელექტრონული სწავლების შემთხვევაში სკოლა ადგენს სასკოლო საათობრივ ბადეს დისტანციური სწავლების პერიოდისათვის. ასევე სკოლა ადგენს საგაკვეთილო ცხრილს თითოეული საკლასო ჯგუფისთვის თითოეულ საგანში, რომელშიც მითითებულია გაკვეთილების ჩატარების ფორმა: დისტანციური ან დასწრებით, ასევე განსაზღვრავს საკლასო განაყოფებს დასწრებით გაკვეთილებისთვის.

- საჯარო სკოლაში ჰიბრიდული დისტანციური სწავლების შემთხვევაში დასაშვებია კლასის გაყოფა დასწრებით გაკვეთილების დაგეგმვისას, ხოლო დისტანციური გაკვეთილების ჩატარება რეკომენდებულია მთელი საკლასო ჯგუფისთვის. სკოლა ვალდებულია უზრუნველყოს მის ხელთ არსებული ყველა შესაძლებლობის გამოყენება, რათა არც ერთი მოსწავლე არ აღმოჩნდეს დისტანციური სასწავლო პროცესის მიღმა, ან არ ჩამორჩეს თანაკლასელებს სწავლაში.


- დისტანციური სწავლების ნებისმიერი მოდელის განხორციელების შემთხვევაში სკოლა ვალდებულია, უზრუნველყოს სპეციალური საგანმანათლებლო საჭიროების მქონე მოსწავლისათვის მის შესაძლებლობებზე მორგებული საგანმანათლებლო პროცესის ორგანიზება, დამრიგებლის, საგნის მასწავლებლების, სპეციალური მასწავლებლისა და საჭიროების შემთხვევაში, სკოლის ინკლუზიური განათლების დამატებითი სპეციალისტების ჩართულობით.

დოკუმენტის მიხედვით, სკოლებმა ტავად უნდა აირჩიონ სწავლების ფორმა, დისტანციური იქნება, დასწრებით თუ შერეული მოდელით.
ვრცლად დისტანციური სწავლების შესახებ დამტკიცებული გეგმის შესახებ, ნახეთ ბრძანება.

[თაკო ფეიქრიშვილი]