გურამ ოდიშარიას განცხადებით, ახალციხის მეჩეთზე შესაძლოა გუმბათის ფერი შეიცვალოს

კულტურისა და ძეგლთა დაცვის მინისტრის განცხადებით, ახალციხის ციხის რესტავრაციის პროცესში თურქი სპეციალისტები ითხოვდნენ, რომ გუმბათი ოქროსფრად არ შეღებილიყო. ამასთან, მინისტრის ინფორმაციით, ისტორიული გისოსები ჩანაცვლდა მოგვირისტებული, ჩახლართული გისოსებით, რომელიც ამ არქიტექტურისთვის დამახასიათებელი არ არის.

გურამ ოდიშარიას თქმით, თურქული მხარის შენიშვნები უმტკივნეულოა და მათი გათვალისწინება რთული არ არის. ვინაიდან საქართველო დაინტერესებულია, რომ სწორად აღდგინონ იშხანი, შემდეგ ოშკი და ზარზმა, საქართველომაც სწორად უნდა აღადგინოს ის კულტურული ძეგლი, რომელიც საქართველოსა და თურქეთის ზიარია.

შეგახსენებთ, ახალციხის ციხეში მდებარე აზი ახმედ ფაშას მეჩეთის გუმბათი, ციხის რესტავრაციის დროს ოქროსფრად შეიღება. მეჩეთის გუმბათის ფერი არაერთხელ გახდა დავის საგანი.

მეჩეთი 1752 წელს აშენდა აზი ახმედ ფაშას მიერ. მეჩეთი რაბათის ისტორიულ უბანში, ახალციხის ზედა ციხის ტერიტორიაზე მდებარეობს.


მეჩეთი რესტავრაციამდე
[SKnews.ge]