თურქეთის კულტურის სამინისტრო ახალციხის ციხეს სწავლობს

თურქეთის კულტურის სამინისტროს რესტავრაციის სამსახურის წარმომადგენლებმა ახალციხის ციხე საქართველოს კულტურული მემკვიდრეობის დაცვის ეროვნული სააგენტოს სპეციალისტებთან ერთად დაათვალიერეს. დაინტერესდნენ რა მდგომარეობაშია თურქული არქიტექტურული ძეგლები და ქართველ სპეციალისტებს საკუთარი მოსაზრებები გაუზიარეს.

მათ მოინახულეს ახალციხის ციხის ტერიტორიაზე მდებარე მეჩეთი და მედრესე. ასევე, დაათვალიერეს რაბათის დასახლებაში მდებარე ძველი აბანოებიც.

შეხვედრას, რომელიც მედიისთვის დახურული იყო, ახალციხის ადგილობრივი ხელისუფლების წარმომადგენლები და ახალციხის ციხის დირექტორი ესწრებოდნენ.

„აინტერესებდათ ჩვენს ტერიტორიაზე არსებული რამდენიმე ისტორიული ძეგლი, კერძოდ მეჩეთი და მედრესე. ასევე მოინახულეს აბანოები, რომელიც განლაგებულია მიმდებარე ტერიტორიაზე. გამოხატეს სხვადასხვა მოსაზრება, კმაყოფილება გამოთქვეს, რომ კარგად არის რესტავრირებული და შენახული, თუმცა, ამასთანავე, ჰქონდათ გარკვეული შენიშვნები, რომელიც მომავალში იქნება გასათვალისწინებელი“, - ამბობს ახალციხის მუნიციპალიტეტის საკრებულოს თავმჯდომარე ოლეგ სანდროშვილი.

კონკრეტულად რა შენიშვნებზეა საუბარი და უკავშირდებოდა თუ არა ეს ვიზიტი მეჩეთის გუმბათის ფერისა და ცხაურების შეცვლაზე დაწყებულ საუბარს, შეხვედრიდან გამოსულ არცერთ მხარეს არ დაუკონკრეტებია.

თურქეთის დელეგაციას არც შეხვედრის დაწყებამდე და არც მისი დასრულების შემდეგ, მედიასთან კომენტარი არ გაუკეთებიათ. ისინი ციხეს თითქმის მთელი დღის განმავლობაში ათვალიერებდნენ და ნაგებობებს ფოტოებს უღებდნენ.



[თამარ თოთაძე, ახალციხე]