'მცდარი ინფორმაციაა' – ადიგენის მერია საზოგადოებრივი ჯანდაცვის ცენტრის განცხადებაზე

"ეს არის მცდარი ინფორმაცია, არავის დაუდგინდა კორონავირუსი მუნიციპალიტეტიდან წასულს და არც ოჯახი იმყოფება თვითიზოლაციაში", – განაცხადეს ადიგენის მერიის საზოგადოებასთან ურთიერთობის სამსახურში.

გუშინ, 22 აპრილს ადიგენის საზოგადოებრივი ჯანდაცვის ცენტრის ხელმძღვანელმა, რუიზან ქიმაძემ განაცხადა, რომ ადიგენის ერთ–ერთ სოფელში 11 დღის წინ სტუმრად მყოფ ახალგაზრდას კორონავირუსზე გამოკვლევა ჩაუტარდა, აღმოჩნდა რომ მას ინფექცია უკვე გადატანილი აქვს, ამის გამო, მასპინძელი ოჯახის რვა წევრი თვითიზოლაციასა და დაკვირვების ქვეშ იმყოფება.

მოგვიანებით მან უარყო ეს ინფორმაცია და განაცხადა, რომ "ჟურნალისტმა არასწორი ინტერპრეტაცია გააკეთა, ეს ამბავი ჯერ კიდევ სადავოა და კომენტარს ვერ გააკეთებს".

"სამხრეთის კარიბჭე" გთავაზობთ 22 აპრილის ჩანაწერს რუიზან ქიმაძესთან.



ვითარების გასარკვევად "სამხრეთის კარიბჭე" ჯანდაცვის სამინისტროს და დაავადებათა კონტროლის ეროვნულ ცენტრს დაუკავშირდა, თუმცა ორივე უწყებამ ადიგენის მერიაში გადაგვამისამართა.

აღნიშნულ თემაზე პირველად მასალა "TOK.TV"-მ მოამზადა, სადაც რუიზან ქიმაძემ მედიას ჯერ დაუდასტურა, რომ მუნიციპალიტეტში სტუმრად მყოფ პირს, 10 დღის შემდეგ კორონავირუსი დაუდასტურდა. მოგვიანებით კი, ამავე გამოცემასთან სატელეფონო საუბარში განაცხადა, რომ "შეეშალა".

[sknews.ge]