ადიგენში 10 დღის წინ სტუმრად მყოფ ახალგაზრდას კორონავირუსი დაუდასტურდა

ფოტო: არქივი

მუნიციპალიტეტის ერთ–ერთ სოფელში ახალგაზრდა 10 დღის წინ ჩავიდა, იყო თუ არა ამ პერიოდში ინფიცირებული უცნობია.

„დღეს მას კორონავირუსი გამოუჟღავნდა, არა როგორც აქტიური, არამედ გადატანილი დაავადება. არ ვიცი ამ ოჯახთან კონტაქტის დროს ჰქონდა თუ არა აქტიური ფაზა, ამიტომ არიან დაკვირვების ქვეშ. ვერ გეტვით რომელი სოფელია და ვერც ოჯახის ვინაობას გაგიმხელთ, იმიტომ რომ არ შეიძლება“, – გვითხრა ადიგენის ჯანდაცვის ცენტრის ხელმძღვანელმა, რუიზან ქიმაძემ.

მისი თქმით, ოჯახში რვა წევრი იმყოფება, კოვიდინფექციის სიმპტომები არ აღენიშნებათ.

„ოჯახში რვა წევრი ცხოვრობს. ისინი თვითიზოლაციაში რჩებიან, სიმპტომები არ აქვთ. ანალიზი არ აგვიღია, ვნახოთ რას გადავწყვეტთ შემდგომში“, – გვითხრა ქიმაძემ.

ადიგენის ჯანდაცვის ცენტრის წარმომადგენელს არ განუმარტავს, რატომ ჩაუტარდა კორონავირუსზე გამოკვლევა იმ ახალგაზრდას, რომელიც ადიგენში იმყოფებოდა.

[ნუკა სტეფნაძე, ადიგენი]