2 200 მასწავლებლიდან კორონავირუსზე სავალდებულო ტესტირება 46%–მა გაიკეთა – გამყრელიძე

დაავადებათა კონტროლისა და საზოგადოებრივი ჯანმრთელობის ეროვნული ცენტრის განცხადებით, 2 200 პედაგოგიდან სავალდებულო ტესტირება 1 011–მა მათგანმა გაიკეთა.

„ჩვენ ვიკვლევდით და ვიკვლევთ მასწავლებლებს, მაგრამ რატომღაც ისინი ოდნავ მოეშვნენ. დაახლოებით 2 200 მასწავლებელი იმყოფებოდა ზაფხულში, აგვისტოს მეორე ნახევარში აჭარაში. ისინი დაექვემდებარენ გამოკვლევას. დღევანდელი მონაცემებით 2 200–დან მხოლოდ 1 011 მივიდა, ანუ 46 პროცენტია, აქედან შვიდს დაუდასტურდა კორონავირუსი, ამიტომ ისევ ვითხოვ ყველა მივიდეს გამოსაკვლევად თავიანთი მუნიციპალიტეტების საზოგადოებრივი ჯანდაცვის ცენტრებში“, – განაცხადა ამირან გამყრელიძემ.

რამდენი მასწავლებელი იმყოფებოდა რეგიონიდან ბოლო პერიოდში აჭარაში, ჩვენთვის უცნობია. „სამხრეთის კარიბჭე“ დაავადებათა კონტროლის ეროვნული ცენტრის სამცხე-ჯავახეთის განყოფილებას დაუკავშირდა, თუმცა ინფორმაციის მოწოდებაზე უარი განაცხადეს.

„თქვენ ძალიან კარგად იცით, რომ მე არ მაქვს ინფორმაციის გაცემის უფლება, ყველაფერი მოგვარებულია მაგათთან [მასწავლებლებთან] დაკავშირებით, მე ვერ გავცემ ინფორმაციას, აკრძალური მაქვს, უნდა მიმართოთ ჩვენს პრესსამსახურს“.

ინფორმაცია ვერ მივიღეთ დაავადებათა კონტროლის საზოგადოებასთან ურთიერთობის სამსახურიდანაც.

„ცალკე ჩაშლილად არ გვაქვს რეგიონის მონაცემი. საქართველოს მასშტაბით 46 პროცენტი გავტესტეთ და მიმდინარეობს ეპიდემიოლოგიური კვლევა“, – განაცხადეს პრესსამსახურში.

„სამხრეთის კარიბჭემ“ მხოლოდ ბორჯომში არსებული მონაცემები მოიპოვა, ბორჯომის საზოგადოებრივი ჯანდაცვის ცენტრის ხელმძღვანელის, მანანა რატიანის განცხადებით, მუნიციპალიტეტიდან აჭარაში 27 მასწავლებელი იმყოფებოდა, კორონავირუსი არცერთ მათგანს აღმოაჩნდა.

დღევანდელი მონაცემებით, ქვეყანაში კორონავირუსით ინფიცირების შემთხვევათა რაოდენობა 2 937–ია, მათ შორის გამოჯანმრთელდა 1 422 პაციენტი. კარანტინის რეჟიმში 6 633 პირი იმყოფება, სტაციონარში მეთვალყურეობის ქვეშ - 836. უცხოეთიდან სამკურნალოდ გადმოყვანილი საქართველოს მოქალაქეების რაოდენობა 41–ია. გარდაცვლილია 19 პაციენტი.

[ნუკა სტეფნაძე]