‘გვაქვს შემთხვევები, როცა ინფექცია გადაიტანეს სტაციონარში მოხვედრის გარეშე’ - მინისტრი

იმ ფაქტს, რომ საქართველოში არის შემთხვევები, როცა პირს გადატანილი აქვს კორონავირუსი ისე, რომ სტაციონარში არ მოხვედრილა, ეკატერინე ტიკარაძე ადასტურებს.

ამის შესახებ მინისტრს კითხვა „სამხრეთის კარიბჭეში“ 22 აპრილს გამოქვეყნებული მასალის საფუძველზე დაუსვეს.

მაშინ რედაქციას ადიგენის ჯანდაცვის ცენტრის ხელმძღვანელმა, რუიზან ქიმაძემ განუმარტა, რომ ადიგენის ერთ–ერთ სოფელში სტუმრად მყოფ კაცს უკვე გადატანილი ჰქონდა ვირუსი: „დღეს მას კორონავირუსი გამოუმჟღავნდა, არა როგორც აქტიური, არამედ გადატანილი დაავადება. არ ვიცი ამ ოჯახთან კონტაქტის დროს ჰქონდა თუ არა აქტიური ფაზა, ამიტომ არიან დაკვირვების ქვეშ“, - განაცხადა მაშინ ქიმაძემ.

დღევანდელ ბრიფინგზე, ჯანდაცვის მინისტრმა დაადასტურა, რომ ასეთი მოქალაქეები, რომლებმაც კოვიდინფექცია უკვე გადაიტანეს, თუმცა ამის შესახებ თავადაც არ ჰქონდათ ინფორმაცია, არსებობენ.

„ჩვენ გვაქვს საქართველოში შემთხვევები, როდესაც პაციენტებს აქვს გადატანილი ინფექცია, რომლებსაც არ უდგინდებოდათ სიმპტომები, ასეთია რამდენიმე მოქალაქე და მათი ყველა მომდევნო კონტაქტი არის გამოკვლეული. ამ ადამიანებში ჩვენ უკვე გვყავს ისეთები, რომლებზე მონიტორინგიც დღესაც მიმდინარეობს“, - განაცხადა ტიკარაძემ.

[თაკო ფეიქრიშვილი]