‘ჩორჩანში კორონავირუსზე ოჯახი შეამოწმეს’ - ადგილობრივები

როგორც ამ სოფლის მცხოვრებლები „სამხრეთის კარიბჭესთან“ ამბობენ, ოჯახზე დაკვირვება ექიმებმა მას შემდეგ დაიწყეს, რაც გაირკვა, რომ მათთან სტუმრად იმყოფებოდა პირი, რომელსაც კორონავირუსი გადატანილი ჰქონდა.

„რამდენიმე დღე აკვირდებოდნენ. სოფელში პოლიციასაც ვხედავდით. მგონი ყოველ დღე ამოდიოდნენ. გუშინ აუღეს ტესტი და როგორც დღეს გაირკვა პასუხი უარყოფითია“, - ამბობენ ადგილობრივები.

ოჯახის რამდენ წევრს ჩაუტარდა კვლევა მეზობლებისთვის უცნობია „სახლში ხუთნი ცხოვრობენ, მაგრამ სამი შვილიშვილიც ჰყავთ სტუმრად“.

შემთხვევაზე არ საუბრობენ არც ადიგენის ჯანდაცვის ცენტრში, არც ადგილობრივ თვითმმართველობაში.

დაავადებათა კონტროლის ეროვნული ცენტრის რეგიონულ განყოფილებაში ამბობენ, რომ ერთადერთი რისი თქმაც შეუძლიათ ის არის, რომ ადიგენში კოვიდინფექცია არავის უდასტურდება.

ადიგენის ერთ–ერთ სოფელში რვასულიანი ოჯახის თვითიზოლაციაში გადაყვანაზე „სამხრეთის კარიბჭემ“ 22 აპრილს დაწერა.

სავარაუდოდ ეს ის ოჯახია, რომელზეც ადიგენის საზოგადოებრივი ჯანდაცვის ცენტრის ხელმძღვანელმა, რუიზან ქიმაძემ გვესაუბრა, მოგვიანებით კი ინფორმაცია უარყო.

მაშინ რუიზან ქიმაძემ „სამხრეთის კარიბჭეს“ ჟურნალისტს უთხრა, რომ ადიგენის ერთ–ერთ სოფელში 10 დღის წინ სტუმრად მყოფ ახალგაზრდას კორონავირუსზე გამოკვლევა ჩაუტარდა, აღმოჩნდა რომ მას ინფექცია უკვე გადატანილი აქვს, ამის გამო, მასპინძელი ოჯახის რვა წევრი თვითიზოლაციასა და დაკვირვების ქვეშ იმყოფება.

მოგვიანებით მან უარყო ეს ინფორმაცია და განაცხადა, რომ "ჟურნალისტმა არასწორი ინტერპრეტაცია გააკეთა, ეს ამბავი ჯერ კიდევ სადავოა და კომენტარს ვერ გააკეთებს".

აღნიშნულ ინფორმაციას სიცრუე უწოდა ადიგენის მერიის პრესსამსახურმაც.

[sknews.ge]