სამცხე–ჯავახეთში თვითიზოლაციასა და კარანტინში 348 პირი იმყოფება

სამცხე–ჯავახეთის მასშტაბით სულ ექვსი საკარანტიო ზონაა გახსნილი. 343 მოქალაქიდან, ახალციხეში სამი პირი იმყოფება, 340 კი ბაკურიანში.

თვითიზოლაციაში რეგიონის მასშტაბით ხუთი ადამიანია. აქედან ერთი ადიგენში, ხოლო ორ–ორი ბორჯომსა და ასპინძაში.

როგორც, ასპინძის ჯანდაცვის ცენტრის ხელმძღვანელი მზია პაპაშვილი ამბობს, თვითიზოლაციაში იმყოფება ერთი მოქალაქე, რომელიც უცხოეთიდან ჩამოვიდა მასთან ერთად იმყოფება მისი მომვლელიც.

„ჩვენთან თვითიზოლაციაში არის ორი პირი, ერთი არის უცხოეთიდან ჩამოსული რომელსაც სჭირდება მომვლელი, სასტუმროში ამის პირობები არ იყო რადგან მომვლელს საჭიროებდა. დაიტესტა ანალიზის პასუხი უარყოფითია და გამოუშვეს ბინაზე“, – გვითხრა მზია პაპაშვილმა.

ასევე ორი მოქალაქეა თვითიზოლაციაში ბორჯომში. როგორც ბორჯომის საზოგადოებრივი ჯანდაცვის ცენტრის ხელმძღვნელმა, მანანა რატიანმა გვითხრა ორივე მათგანი მძღოლია, ისინი საერთაშორისო გადაზიდვებზე მუშაობენ.

ერთი პირი იმყოფება სავალდებულო თვითიზოლაციაში ადიგენში. „სამხრეთის კარიბჭე“ დაუკავშირდა ადიგენის საზოგადოებრივი ჯანდაცვის ცენტრის ხელმძღვანელს რუიზან ქიმაძეს, თუმცა მან ჩვენს სატელეფონო ზარებს არ უპასუხა.

ქვეყნის მასშტაბით კორონავირუსით ინფიცირების 593 შემთხვევაა დაფიქსირებული, აქედან 223 გამოჯანმრთელდა, ცხრა კი გარდაიცვალა.

კარანტინის რეჟიმში 5 028 პირი რჩება, ხოლო სტაციონალური მეთვალყურეობის ქვეშ კი 537.

[ნუკა სტეფნაძე, ახალციხე]