ახალციხელი უფროსკლასელები მაგიდის ჩოგბურთში შეეჯიბრნენ

ჩემპიონატი საქართველოს მთავარი პროკურატურის პროექტის „საზოგადოებრივი პროკურატურის“ ფარგლებში გაიმართა.

„პირველ სკოლას წარმოვადგენ. გუნდში ორი მოსწავლე ვართ. პირველ ეტაპზე წავაგეთ, მეორე ეტაპზე გამარჯვების იმედი გვაქვს“,- გვითხრა პირველი საჯარო სკოლის მოსწავლემ ბექა გოგოლაძემ.

ჩემპიონატი, რომელიც ახალციხის სპორტულ სკოლაში მიმდინარეობდა, 18:00 საათზე დასრულდა. პირველი ადგილი ახალციხის მეხუთე სკოლის მოსწავლეს ავთანდილ მიქელაძეს ერგო. მეორე ადგილზე მესამე სკოლის მოსწავლე რაზმიკ გრიგორიანი გავიდა, მესამე ადგილის მფლობელი კი ამავე სკოლის მოსწავლე ვლადიმერ გრიგორიანი გახდა. გამარჯვებულებს სიგელები გადაეცათ.

საქართველოს მთავარი პროკურატურის პროექტი ”საზოგადოებრივი პროკურატურა” 2006 წლიდან ხორციელდება. პროექტის ფარგლებში საჯარო სკოლებში არაერთი ღონისძიება გაიმართა. პროექტის სამიზნე ჯგუფს მე-11 და მე-12 კლასის მოსწავლეები წარმოადგენენ.

„აქტიურად განვაგრძობთ შეხვედრებს მოსწავლეებთან და სამართლებრივ საკითხებზე ვუტარებთ ლექცია-სემინარებს. ამ ეტაპზე, მოსწავლეების სურვილის გათვალისწინებით, ვატარებთ მაგიდის კალათბურთის ჩემპიონატს. მოგეხსენებათ შემოდგომაა და გარეთ აქტივობებს აღარ ვმართავთ, რადგან ცივა და შესაძლებელია ბავშვები გაცივდნენ, ამიტომ ვარჩიეთ დახურული შენობა. გაზაფხულიდან ვგეგმავთ ფეხბურთისა და კალათბურთის ჩემპიონატის ჩატარებასაც“, - ამბობს ახალციხის რაიონული პროკურორის მოადგილე დავით ჯინჭველაძე.

[თინათინ ზაზაძე, ახალციხე]