პროკურატურა მოსწავლეებთან შეხვედრებს აგრძელებს

საქართველოს მთავარი პროკუტრატურის პროექტი ”საზოგადოებრივი პროკურატურა” 2006 წლიდან ხორციელდება. პროექტის ფარგლებში მსგავსი შეხვედრები ახალციხის ყველა საჯარო სკოლაში ტარდება. პროექტის სამიზნე ჯგუფს მე-11 და მე-12 კლასის მოსწავლეები წარმოადგენენ.

”მოსწავლებთან სამართლებრივ საკითხებს განვიხილავთ. ვაცნობთ დანაშაულებების იმ კატეგორიებს, რომლებიც ამ ასაკში უნდა უნდა იცოდნენ. მნიშვნელოვანია, რომ ფლობდნენ ინფორმაციას, რათა თავიდან იქნეს აცილებული მათი მხრიდან დანაშაულის ჩადენა. ამ პროექტით პრევენციულ ღონისძიებებს ვახორციელებთ”, - განმარტავს ახალციხის რაიონული პროკურორის მოადგილე დავით ჯინჭველაძე.

დღევანდელ შეხვედრას ახალციხის პირველი საჯარო სკოლის ასამდე მოსწავლე დაესწრო. მათ ნაწილს აღნიშნულ პროექტში მონაწიელობა გასულ წელბშიც მიუღია.

”შარშან იმიტირებული სასამართლო ჩავატარეთ და პროკურორის როლში ვიყავი. ძალიან საინტერესო პროექტია, უკეთ გავეცანით სტრუქტურის საქმიანობას. ვფიქრობ, რომ მეტი გამოცდილება შევიძინე და ვისწავლე პრობლემების გადაჭრა. ეს პროექტი შესაძლოა მომავალი პროფესიის არჩევაშიც დამეხმაროს”, - ამბობს მე-11 კლასის მოსწავლე ნინო ჩიტაშვილი.

პროექტის ფარგლებში შეხვედრები დღეს, 4 აპრილს დაიწყო და სასწავლო წლის ბოლოს დასრულდება. მსგავსი შეხვედრების ჩატარება ახალციხის საჯარო სკოლების გარდა ასპინძის, ადიგენისა და ბორჯომის მუნიციპალიტეტებშიც იგეგმება.

”წლის ბოლომდე ჩვენ არაერთ სპორტულ და ინტელექტუალურ ღონისძიებებს ჩავატარებთ. ასევე, ვაპირებთ, რომ მოსწავლეები ქალაქგარეთ გავიყვანოთ და ის ადგილები ვანახოთ, რომლიბიც აქამდე ნანახი არ აქვთ”, - ამბობს დავით ჯინჭველაძე.

[თინათინ ზაზაძე, ახალციხე]