უფროსკლასელები ერთმანეთს მხარის ისტორიის ცოდნაში შეეჯიბრნენ

ვიქტორინა ახალციხის მუნიციპალიტეტის გამგეობის კულტურის სამსახურის ორგანიზებით გაიმართა. ინტელექტუალურ შეჯიბრში ახალციხის მუნიციპალიტეტის სოფლების 18 მეათე, მეთერთმეტე და მეთორმეტეკლასელი მონაწილეობდა.

მონაწილეებს ინდივიდუალურად 20 – 20 კითხვა დაურიგდათ და პასუხის გასაცემად ნახევარი საათი მიეცათ.

„კითხვები წინასწარ იყო შერჩეული, შემოწმებული, შესწორებული და დალუქული“, – ამბობს ახალციხის მუნიციპალიტეტის გამგეობის კულტურის სამსახურის უფროსი მაია სხირტლაძე.

მონაწილეების ნაშრომები ჟიურიმ, ახალციხის მუნიციპალიტეტის გამგებლის მოადგილემ გურამ მელიქიძემ და ახალციხის მუნიციპალიტეტის საკრებულოს თავმჯდომარემ დავით ლომიძემ შეაფასეს.

ჟიურის გამარჯვებულების გამოსავლენად მეორე ტურის ჩატარება მოუწია, რადგან 18 მონაწილიდან სამმა ერთი და იგივე ქულა დააგროვა. ამ სამ მონაწილეს დამატებითი კითხვები დაუსვეს.

პირველ ადგილზე ახალციხის მუნიციპალიტეტის სოფელი აწყურის საჯარო სკოლის მოსწავლე ანა გვირჯიშვილი გავიდა, მეორეზე – კლდის საჯარო სკოლის მოსწავლე ფიქრია ცუცქირიძე, მესამე ადგილის მფლობელი კი აწყურის საჯარო სკოლის მოსწავლე ნინო მუმლაძე გახდა. გამარჯვებულებს სიგელები და წიგნები გადასცეს.

ჟიურიმ გამარჯვებულები სხვადასხვა ნომინაციებშიც გამოავლინა. ყველაზე სწრაფის ტიტული სვირის საჯარო სკოლის მოსწავლემ ნინო გოგოლაძემ მიიღო; ყველაზე სრულყოფილი პასუხისთვის ვალის N1 საჯარო სკოლის მოსწავლე თინათინ ხითარიშვილი დაჯილდოვდა; ყველაზე არგუმენტირებული პასუხი ვალის N1 საჯარო სკოლის მოსწავლემ კოტე დემეტრაძემ გასცა; არაქართულენოვანი სკოლებიდან კი ყველაზე მაღალი ქულა პატარა პამაჯის საჯარო სკოლის მოსწავლემ ელიზა გურგენიანმა აიღო.

ნომინაციაში გამარჯვებულებს გურამ დოჩანაშვილის „ქართული პოეზიის საგანძურები გადაეცათ.

საჩუქრებისთვის ახალციხის მუნიციპალიტეტის გამგეობის ბიუჯეტიდან 197 ლარი დაიხარჯა.

[მანანა სარაშვილი, ახალციხე]