ახალციხეში ველურად ამოსული კანაფის ჯიშის მცენარეები გაანადგურეს

რაიონული პროკურატურის აქციაში ახალციხის საჯარო სკოლების მე-9, მე-10 და მე-11 კლასიის მოსწავლეები ჩაერთვნენ.

„ქალაქში ნაწილობივ განადგურდა გარეულად ამოსული კანაფის ჯიშის მცენარეები. რადგან ძირიანად ამოვძირკვეთ, აღარ ჩაიპნევა თესლი და თავიდან აღარ აღმოცენდება", - ამბობს ახალციხის რაიონული პროკურორის მოადგილე დავით ჯინჭველაძე

მისივე თქმით, მსგავსი აქციის გამართვის იდეა უფროსკლასელებისგან წამოვიდა: "ხშირად დავდივართ სკოლებში და ვხვდებით უფროსკლასელებს. ერთ-ერთი შეხვედრის დროს მათ წამოჭრეს ეს პრობლემა და ერთობლივად გადავწყვიტეთ, რომ ქალაქში მსგავსი აქცია ჩაგვეტარებინა“.

„მინდა, რომ პროკურორი გავხდე, ძალიან მაინტერესებს ეს საქმე. ეს მცენარე უნდა განადგურდეს მთელს ქალაქში, შევეცდები ჩემს მეგობრებთან ერთად, თუნდაც მარტომ, გავანადგურო მსგავსი მცენარეები“, - ამბობს მეორე საჯარო სკოლის, მე-10 კლასის მოსწავლე მიშა თოდუა.

ახალციხის მიმდებარე ტერიტორაზე განადგურებული მცენარეები ადგილზევე დაიწვა.

ანტინარკოტიკული აქცია საქართველოს მთავარი პროკურატურის „საზოგადოებრივი პროკურატურის“ პროექტის ფარგლებში გაიმართა. აღნიშნული პროექტი 2006 წლიდან ხორციელდება. პროექტის სამიზნე ჯგუფს უფროსკლასელები წარმოადგენენ. პროექტის ფარგლებში პროკურატურა მათთან აწყობს შეხვედრებს, იმიტირებულ სასამართლო პროცესებს, გამწვანების აქციებს და ა.შ.

[მანანა სარაშვილი, ახალციხე]