არ გამოვრიცხავ აღდგომის ღამეს ონლაინ რეჟიმში ჩატარდეს წირვა – ეკატერინე ტიკარაძე

„მნიშვნელოვანია, პასუხისმგებლობები სწორად გადავინაწილოთ და სწორად გავიაზროთ ის საფრთხე, რომელის წინაშეც არა მხოლოდ საქართველო, არამედ მთელი მსოფლიო დგას. ჩვენ ნათელი მაგალითები გვაქვს იმისა, თუ როგორი ტრაგედია დატრიალდა სხვადასხვა ქვეყანაში ამ რეკომენდაციის არდაცვის გამო. კორეაში გვაქვს მაგალითი, სადაც ინფექციის გავრცელება ძალიან კარგად იმართა. რეკომენდაციების არგათვალისწინების გამო, ტრაგედია დატრიალდა ირანში, ამის ყველაზე საუკეთესო მაგალითი გვაქვს იტალიაში. მნიშვნელოვანია, რომ ჩვენმა მოქალაქეებმა დაიცვან სახელმწიფოს და ჯანდაცვის სამინისტროს მხრიდან გაცემული ყველა ის რეკომენდაცია, რომელიც უკვე 2 თვეზე მეტია ჩვენგან ყოველდღიურ რეჟიმში ჟღერდება“, – განაცხადა ეკატერინე ტიკარაძემ.

მისი თქმით, ეკლესიასთან მოლაპარაკების კუთხით, საკმაოდ დადებითი დინამიკა აქვთ.

„ისინი უკვე თვითონ მოუწოდებენ მრევლს, რომ ამ საფრთხის გამო დარჩნენ სახლში. მე ძალიან დიდი იმედი მაქვს, რომ შემდეგი ორი დღის განმავლობაში, ჩვენ კიდევ უფრო ნათლად დავინახავთ, თუ რამდენად მაღალი სოციალური და მოქალაქეობრივი პასუხისმგებლობა აქვთ ჩვენს მოქალაქეებს და ჩვენს მრევლს, ასევე ეკლესიასაც. აქედან გამომდინარე, მე არ გამოვრიცხავ იმასაც, რომ აღდგომის ღამეს ნამდვილად ჩატარდეს ონლაინ რეჟიმში წირვა და ეკლესიებში მრევლი არ მივიდეს“ – აღნიშნავს ტიკარაძე.

თუმცა საპატრიარქოს ბოლო ინფორმაციით სააღდგომო ლიტურგია დიდ ტაძრებში ჩვეულებრივად ჩატარდება, პატარა ტაძრებში კი, მრევლი ეზოში დისტანციის დაცვით იდგება . მათივე თქმით, მრევლი ე.წ კომენდანტის საათის დაწყებამდე მივა, ხოლო ტაძარს დილის 06:00 საათზე დატოვებს .

31 მარტიდან ქვეყანაში საყოველთაო კარანტინია გამოცხადებული. იკრძალება სამზე მეტი პირის შეკრება, ხოლო 21:00 საათიდან დილის 06:00 საათამდე ქვეყანაში კომენდანტის საათი მოქმედებს.ასევე, 15 აპრილიდან, ოთხ დიდ ქალაქში შესვლა და გასვალა 10 დღით აიკრძალა აიკრძალა.
დღეის მონაცემებით საქართველოში ახალი კორონავირუსის 336 დადასტურებული, 74 გამოჯანმრთელების და 3 გარდაცვალების შემთხვევაა დაფიქსირებული.

[sknews.ge]