ბორჯომის ეკლესიებში სააღდგომო ლიტურგია დილით ჩატარდება, მონასტრებში კი - ღამით

ბორჯომის წმინდა ილია თეზბიტელის სახელობის ეკლესიის დეკანოზი, იოანე ხეცურიანი ამბობს, რომ ეპარქიის გადაწყვეტილებით, სააღდგომო ლიტურიგია დილით ჩატარდება. ტაძრების ნაწილში წირვა 10:00 საათზე, ნაწილში კი 09:00 საათზე დაიწყება.

მისი განმარტებით, ეს გადაწყვეტილება, ქვეყანაში არსებული საგანგებო მდგომარეობის გათვალისწინებით მიიღეს.

„ყველა მოქმედ ტაძარში იქნება ლიტურგია დილით, ხოლო ღამე იქნება მონასტრებში. საერო ტაძარში ყველგან იქნება დილით, გამომდინარე იქიდან, რომ ჩვენ არ გვაქვს ტაძრებში იმხელა ეზოები, რომ ხალხი დადგეს მთელი ღამის განმავლობაში. ამიტომ დაცული, რომ იყოს ჯანდაცვის სამინისტროს მიერ მითითებული რეკომენდაციები, დილით ჩავატარებთ“,– აღნიშნა ბორჯომის წმინდა ილია თეზბიტელის სახელობის ეკლესიის დეკანოზმა, იოანე ხეცურიანმა.

მწვანე მონასტერში საღმრთო ლიტურგია ღამით შესრულება. ტაძრის წინამძღვარი ამბობს, რომ მრევლიც შეძლებს დასწრებას, თუმცა მცირე რაოდენობით.

„ჩვენთან ღამისთევა ჩატარდება, ალბათ მრევლიც მოვა მცირე ნაწილი, რადგან გავაფრთხილეთ, რომ ნაწილი ლიტურგიას დილით დაესწროს ბორჯომის სხვა ტაძრებში“,– განაცხადა წმინდა გიორგის სახელობის ტაძრის არქიმანდირტმა იოაკიმემ.

მისი თქმით, მონასტერში ღვთისმსახურება უსაფრთხოების წესების დაცვით აღესრულება.

„ორმეტრიანი დისტანციით მონიშვნები გვაქვს გაკეთებული, დაახლოებით 40–მდე ადამიანი ეტევა. ამდენი არც მოვა, დღეს გარდამოხსნაზე სულ 20 კაცი იყო მოსული, როცა 60 ადამიანი მოდიოდა ხოლმე. ვინც ტაძარში იქნება ყველას დაურიგდება პირბადე“,– აღნიშნა არქიმანდიტრმა მამა იოაკიმემ.

ახალციხის ამაღლების სახელობის ტაძრის დეკანოზის, ნიკოლოზ აბრამაშვილის თქმით, ჯერ გადაწყვეტილი არ აქვთ, როგორც ჩატარდება ტაძრებში სააღდგომო ლიტურგია.

„ჯერ არ ვიცით როგორ იქნება ჩენს ტაძარში სააღდგომო ლიტურგია, სავარაუდოდ ღამისთევით ჩატრდება, მაგრამ ეს დაზუსტებული არ არის“,– გვითხრა დეკანოზმა ნიკოლოზ აბრამაშვილმა.

15 აპრილს მთავრობის ადმინისტრაციაში გამართულ ბრიფინგზე პრემიერის პრესსპიკერმა, ირაკლი ჩიქოვანმა განაცხადა, რომ მთავრობის და საპატრიარქოს ერთობლივი გადაწყვეტილებით აღდგომის ღამეს ეკლესიები არ დაიხურება.

[ნუკა სტეფნაძე, ბორჯომი]