‘მრევლი სააღდგომო ლიტურგიაზე კომენდანტის საათის დაწყებამდე მივა’ – დეკანოზი

საპატრიარქოს პრესსპიკერის, ანდრია ჯაღმაიძის განმარტებით, გადაწყვეტილება, რომელიც მთავრობასთან ერთად მიიღეს, მრევლისთვის შეღავათიანი პირობაა.

„გათვალისწინებული იქნება ის მითითება, რაც სახელმწიფოს მხრიდან და ჯანდაცვის შესაბამისი სამსახურების მხრიდან იქნა მოწოდებული. ჩვენ გადავწყვიტეთ, რომ მრევლი მივიდეს ტაძარში „კომენდანტის საათის“ დაწყებამდე 21:00 საათამდე და მსახურების შემდეგ ტაძარი დატოვოს დილის 6 საათზე. ეს არის ძალიან შეღავათიანი პირობა, რომ მრევლს შეეძლება სრულყოფილად მიიღოს მონაწილეობა სააღდგომო მსახურებაში," - განაცხადა ჯაღმაიძემ.

მისივე თქმით, ის ვისთვისაც შეუძლებელია ღამისთევის წირვაზე დასწრება, შეუძლია მეორე დღეს მივიდეს.
ასევე ჯაღმაიზემ აღნიშნა რომ, აღდგომის დღესაწაულზე ტრაპეზი არ გაიმართება რადგან ეს გამოიწვევს ბევრი ხალხის თავშეყრას.
„სასურველია, რომ სადღესასწაულო, ტრადიციული ტრაპეზი არ გაიმართოს იმიტომ, რომ ეს დამატებით სირთულეს ქმნის, სუფრაზე ბევრი ხალხის თავმოყრა. ამიტომ, რეკომენდაციაში შედის ესეც“, - აღნიშნა ჯაღმაიძემ.

დღესვე შეთანხმების შესახებ ბრიფინგი გაიმარტა საქართველოს მთავრობაშიც. მათი ინფორმაციით, დიდ ტაძრებში მრევლი ორ მეტრიან დისტანციას დაიცავს, მცირეში კი მხოლოდ სასულიერო პირები იქნებიან.

31 მარტიდან ქვეყანაში საყოველთაო კარანტინია გამოცხადებული. იკრძალება სამზე მეტი პირის შეკრება, ხოლო 21:00 საათიდან დილის 06:00 საათამდე ქვეყანაში კომენდანტის საათი მოქმედებს.

15 აპრილიდან, ოთხ დიდ ქალაქში შესვლა და გასვალა 10 დღით აიკრძალა.

[ნუკა სტეფნაძე]