'აღდგომის მერე ურჩი მრევლი იფეთქებს ბიოლოგიური ბომბივით' – ექიმი ლევან ხარაშვილი

"აღდგომის მერე ურჩი მრევლი იფეთქებს ბიოლოგიური ბომბივით. ძლივს შეკავებული მრუდი აარტყამს პიკს. გაივსება რეანიმაციები და მეორე ტალღად მედპერსონალი იბუთქებს. ბერგამოს კადრებს თბილისშიც ვნახავთ. დაიხოცება ხალხი და ექიმების კეკლუცა ბრიფინგებს მძიმე კადრები შეცვლის. მალე შეზღუდვები აზრს დაკარგავს", – წერს ფეისბუკზე ლევან ხარაშვილი.

კორონავირუსის გამო საქართველოში საგანგებო რეჟიმი და ე.წ. კომენდანტის საათი მოქმედებს. მიუხედავად შეზღუდვებისა საქართველოს მართლმადიდებელი ეკლესია ღვთისმსახურებას მრევლის თანდასწრებით ატარებს. გარდა ამისა, 12 აპრილს ცნობილი გახდა, რომ სააღდგომო ღვთისმსახურებას 19 აპრილს კომენდანტის საათის დროს ჩაატარებს.

გუშინ, 12 აპრილს ახალციხისა და ტაო-კლარჯეთის ეპარქიის მიტროპოლიტრმა, თეოდორე ჭუაძემ "სამხრეთის კარიბჭესთან" განაცხადა, რომ მას არ შეუძლია მრევლს სახლში დარჩენისკენ მოუწოდოს. რაც შეეხება ერთი კოვზით ზიარებას, სასულიერო პირის თქმით, "ქრისტეს სისხლი და ხორცი ინფექციის მატარებელი ვერ იქნება".

[sknews.ge]