პირველ საუნივერსიტეტო კლინიკაში 6 მძიმე პაციენტია

კლინიკის დირექტორის, ლევან რატიანის განცხადებით, ამ ეტაპზე მათთან კორონავირუსით ინფიცირებული 54 პაციენტი იმყოფება.

„ექვსი პაციენტი რჩება რეანიმაციულ განყოფილებაში, სამი მართვით სუნთქვაზეა, სამი - სპონტანურზე. დღეს ლუგარის ლაბორატორიიდან ველოდებით ანალიზების პასუხს, რადგან ამ პაციენტების შემთხვევაში გასულია პროტოკოლით გათვალისწინებული დღეები", – განმარტა ლევან რატიანმა.

მისი ინფორმაციით, პირველ საუნივერსიტეტო კლინიკაში მკურნალობას განაგრძობენ ორსული და მცირეწლოვანი ბავშვები, მათი მდგომარეობა სტაბილურია.

„ინტენსიური თერაპიის განყოფილებაში მყოფი ყველა პაციენტის მდგომარეობა მეტ-ნაკლებად სტაბილურია და ამ ეტაპამდე არ დადასტურებულა არცერთი უარყოფითი კლინიკური გამოვლინება. სტაბილურია ორი ბავშვის და ორსული პაციენტების მდგომარეობაც".

საქართველოში 9 აპრილის 13:00 საათის მონაცემებით, კორონავირუსის 214 შემთხვევაა დადასტურებული. 50 პაციენტი გამოჯანმრთელდა. კარანტინის რეჟიმში 4 722 პაციენტი იმყოფება, ხოლო სტაციონალური მეთვალყურეობის ქვეშ 408. ინფექციას ქვეყანაში სამი ადამიანი ემსხვერპლა, სამივე მათგანი 70 წელს გადაცილებულია.

კორონავირუსით ინფიცირებული პაციენტებიდან დღეის მდგომარეობით, თბილისის ინფექციურ საავადმყოფოში 33 მკურნალობს, აქედან შვიდის მდგომარეობა მძიმეა, მათ ორმხრივი პნევმონია აქვთ.

ვახტანგ ბოჭორიშვილის სახელობის კლინიკაში COVID 19–ით სულ 13 პაციენტია მოთავსებული, მათ შორის ხუთი მცირეწლოვანი პაციენტის მდგომარეობა საყურადღებოა.