'COVID 19–ით ინფიცირებული 5 მცირეწლოვანი პაციენტის მდგომარეობა საყურადღებოა' – ინფექციონისტი

აკადემიკოს ვახტანგ ბოჭორიშვილის კლინიკის სამედიცინო პერსონალი, ფოტო: საქართველოს პარლამენტის ეროვნული ბიბლიოთეკა

ვახტანგ ბოჭორიშვილის სახელობის კლინიკაში COVID 19–ით სულ 13 პაციენტია მოთავსებული აქედან ერთ-ერთის მდგომარეობა განსაკუთრებით საყურადღებო და მძიმეა. ხუთ პაციენტს პნევმონია აქვს.

„ჩვენს კლინიკაში მკურნალობს 55 პაციენტი, აქედან 13 არის კორონავირუსით ინფიცირების დადასტურებული შემთხვევა. ჩვენს კლინიკაში ახალი დადასტურებული შემთხვევა არ გვაქვს. ამ 13 პაციენტიდან ხუთთან არის პნევმონია, ანუ შედარებით საყურადღებო პაციენტები არიან, მაგრამ ერთი განსაკუთრებით საყურადღებო და მძიმეა. კლინიკაში ასევე მოთავსებულია ხუთი მცირეწლოვანი პაციენტი და მათი მდგომარეობაც საყურადღებოა,“ - განაცხადა ბოჭორიშვილის სახელობის კლინიკის ინფექციონისტმა ნინო ალხაზიშვილმა.

საქართველოში 9 აპრილის 11:00 საათის მონაცემებით, კორონავირუსის 214 შემთხვევაა დადასტურებული. 50 პაციენტი გამოჯანმრთელდა. კარანტინის რეჟიმში 4 722 პაციენტი იმყოფება, ხოლო სტაციონალური მეთვალყურეობის ქვეშ 408. ინფექციას ქვეყანაში სამი ადამიანი ემსხვერპლა, სამივე მათგანი 70 წელს გადაცილებულია.

კორონავირუსით ინიფიცირებული პაციენტებიდან დღეის მდგომარეობით, თბილისის ინფექციურ საავადმყოფოში 33 მკურნალობს, აქედან შვიდის მდგომარეობა მძიმეა, მათ ორმხრივი პნევმონია აქვთ.

[sknews.ge]