პირველ საუნივერსიტეტო კლინიკაში, ოთხი მძიმე პაციენტიდან ერთის მდგომარეობა კრიტიკულია

კლინიკის დირექტორის ლევან რატიანის განცხადებით მძიმე პაციენტი მათთან დღეს, სამ აპრილს შეიყვანეს.

„ჩვენს კლინიკაში გადმოყვანილი ერთ–ერთი ქალბატონის მდგომარეობა უკიდურესად მძიმეა. შემოყვანისთანავე გადაყვანლი იქნა მართვით სუნთქვაზე. კლინიკურად სახეზეა კოვიდინფიცირების შემთხვევა, ასევე ორმხრივი ფილტვების ანთება, ანამნეზით აქვს გულის უკმარისობა, არტერიული ჰიპერტენზია. პაციენტს ჩაუტარდა წინასწარი კვლევები, რომელიც პროტოკოლით არის მოწოდებული, ამ ეტაპზე პაციენტი მკურნალობას აგრძელებს კრიტიკული დეპარტამენტის განყოფილებაში,“ – განაცხადა რატიანმა.

გარდა ამისა, პირველ საუნივერსიტეტო კლინიკაში კოვიდინფირებული ორი ორსული ქალი მკურნალობს, მათი მდგომარეობა სტაბილურია. 14 პაციენტია მოთავსებული საქართველოს სხვადასხვა რეგიონებიდან. ლევან რატიანის განმარტებით, მათი მდგომარეობა ამ დროისთვის სტაბილურია და უტარდებათ სხვადასხვა სახის კვლევები.

პირველ საუნივერსიტეტო კლინიკაში, ჯამში კორონავირუსით 34 პაციენტი მკურნალობს, აქედან ოთხი კრიტიკული განყოფილების დეპარტამენტში.

საქართველოში 3 აპრილის 20:40 საათის მონაცემებით, კორონავირუსის 148 შემთხვევაა დადასტურებული. 27 პაციენტი უკვე გამოჯანმრთელებულად მიიჩნევა. კარანტინის რეჟიმში 5 392 პაციენტი იმყოფება, ხოლო სტაციონალური მეთვალყურეობის ქვეშ 319.

ცნობისთვის საქართველოში კორონავირუსის შემთხვევა პირველად 26 თებერვალს დაფიქსირდა. ვირუსის დაფიქსირებიდან ერთ თვეზე მეტი გავიდა, ამ დროის განმავლობაში ქვეყანაში გარდაცვალების ფაქტი არ ფიქსირდება.

[ნუკა სტეფნაძე, ახალციხე]