ინფექციურ საავადმყოფოში COVID 19–ით ინფიცირებულ 7 პაციენტს მძიმე პნევმონია აქვს

როგორც, თბილისის ინფექციური საავდამყოფოს სამედიცინო დირექტორმა, მარინა ეზუგბაიამ ჟურნალისტებს განუცხადა, მათ კლინიკაში ამ ეტაპზე კორონავირუსით ინფიცირებული 33 პაციენტი რჩება, გამოჯანმრთელდა და კლინიკიდან გაეწერა 37 პირი.

„ამ ეტაპზე დადასტურებული 33 პაციენტი გვყავს, მათი ჯანმრთელობის მდგომარება თითქმის უცვლელია. მძიმე პნევმონიით გვყავს შვიდი პაციენტი, აქედან ორი შედარებით არის მძიმე. რომლებთანაც მიუხედავად დაწყებული მკურნალობისა დაავადება მაინც პროგრესირებს, მაგრამ ძალიან აგრესიულადაც არა. ჩვენ იმედი გვაქვს, რომ მათი მდგომარეობაც დასტაბილურდება და გამოჯანმრთელდებიან. დანარჩენი ხუთი პაციენტი ჯერჯერობით, როგორც მძიმე პნევმონია და მძიმე დაავადების ფორმა ასე ფასდება,“ – განაცხადა ეზუგბაიამ.

ეზუგბაიას განცხადებით, მათ კლინიკაში დღის განმავლობაში 10 პაციენტზე გაკეთდება ტესტი, აქედან ექვსი საეჭვო შემთხვევაა, ხოლო ოთხს განმეორებით უტარდება.

საქართველოში 9 აპრილის 11:00 საათის მონაცემებით, კორონავირუსის 214 შემთხვევაა დადასტურებული. 50 პაციენტი გამოჯანმრთელდა.

კარანტინის რეჟიმში 4 722 პაციენტი იმყოფება, ხოლო სტაციონალური მეთვალყურეობის ქვეშ 408. ინფექციას ქვეყანაში სამი ადამიანი ემსხვერპლა, სამივე მათგანი 70 წელს გადაცილებულია.

[ნუკა სტეფნაძე, ახალციხე]