კორონავირუსით ინფიცირებული სამი პაციენტის მდგომარეობა სტაბილურია

პირველი მარტის მონაცემებით თბილისის ბოქსირებულ განყოფილებაში 24 პაციენტია.

"გუშინ დღისით გვყავდა 36 პაციენტი, აქედან 24-ის ანალიზი წაიღეს ლუგარის ლაბორატორიაში. 19-ზე გვქონდა უარყოფითი პასუხი. მოხდა მათი კარანტინში გადაყვანა. სულ 21 პაციენტი გადავიყვანეთ კარანტიში, ანუ, ამ 19-ს პლიუს ძველი მიღებული 2. დარჩენილი პაციენტებიდან რამდენიმე პასუხი არის, თუმცა ისინი საკარანტინო ზონაში გადაყვანას მაინც არ ექვემდებარებიან. მათ აქვთ სიმპტომები, უბრალოდ არ აქვთ ეს დაავადება, შეიძლება ჰქონდეთ სხვა დაავადება. ასეთი პაციენტები, სულ 5 პაციენტი სხვა განყოფილებაში გვყავს მოთავსებული", – განაცხადა ინფექციონისტმა რევაზ მეჭურჭლიშვილმა.

მისი თქმით, ამ ეტაპზე ხუთი პირის ანალიზის პასუხს ელოდებიან. დღეს, პირველ მარტს კი დამატებით ცხრა გადაიგზავნა ლუგარის ლაბორატორიაში.

29 თებერვალს საქართველოში კორონავირუსის მესამე შემთხვევა დადასტურდა. ინფიცირების პირველი შემთხვევა საქართველოში 26 თებერვალს დაფიქსირდა, მეორე კი დაავადებათა კონტროლის ცენტრმა 28 თებერვალს დაადასტურა.

[sknews.ge]