თბილისის ინფექციურ საავადმყოფოში შესულ ორ ახალ პაციენტს მძიმე პნევმონია აქვს

როგორც, ეზუგბაიამ ჟურნალისტებთან განაცხადა ხუთი ახალი დადასტურებული შემთხვევიდან ორს მძიმე პნევმონია აქვს, ხოლო მათ კლინიკაში მყოფ 38 პაციენტიდან 22–ს ასევე პნევმონია აღენიშნება.

„როგორც ყოველთვის 24 საათის ინფორმაციას გაწვდით ხოლმე და გუშინ დილით გვქონდა 170 შემთხვევა, დღეს გვაქვს 188 დადასტურებული შემთხვევა. ანუ 18 ახალი შემთხვევიდან ხუთი პაციენტი ჩვენთან იმყოფება. მათი კონტაქტებიც ცნობილია, ჩვენთან მყოფი პაციენტების კონტაქტებია. დღე–ღამის განმავლობაში ჩვენთან 28 პაციენტს ჩაუტარდა ტესტირება, აქედან ხუთი როგორც ვთქვით დადებითია, ხოლო სამი ჯერ კიდევ გაურკვეველია, რომელიც დღის განმავლობაში გაირკვევა, ხოლო დანარჩენი იყო უარყოფითი,“ – განაცხადა ეზუგბაიამ.

მან, ასევე აღნიშნა რომ მათ კლინიკაში კვლავ ერთი კრიტიკული პაციენტი რჩება და ოთხი მძიმე, ასევე 22 პაციენტს აქვს პნევმონია.

„ამ ეტაპზე ჩვენთან 38 პაციენტი წევს, გაწერილი გვყავს უკვე 29 პაციენტი, ერთი გვყავს კრიტიკული პაციენტი, რომლის სტაბილიზებაც ჯერჯერობით ვერ მოხერხდა. ასევე ოთხი მძიმე პაციენტი გვრჩება, რომელთა მდგომარეობის სტაბილიზაცია უკვე მოხდა. გუშინ შემოსული პაციენტებიდან დაგვემატა კიდევ ორი, მძიმე პნევმონიით. ასევე გვყავს 22 პაციენტი საშუალო სიმძიმის პნევმონიით.“ – განაცხადა ეზუგბაიამ .

საქართველოში 6 აპრილის 11:30 საათის მონაცემებით კორონავირუსის 188 შემთხვევაა დადასტურებული, 36 პაციენტი უკვე გამოჯანმრთელებულად მიიჩნევა. კარანტინის რეჟიმში 5 056 პაციენტი იმყოფება, ხოლო სტაციონალური მეთვალყურეობის ქვეშ 386, გარდაცვლია 2 პაცინეტი.

ნუკა სტეფნაძე, ახალციხე