ინფექციურ საავადმყოფოში მყოფი ახალი პაციენტებიდან ხუთს პნევმონია აქვს

„გუშინ დილიდან საღამომდე ჩვენ 11 პაციენტი დაგვემატა, აქედან ხუთთან არის პნევმონია, მაგრამ ეს პნევმონია არ არის მძიმე. დანარჩენებთან პნევმონია არ ფიქსირდება ჯერჯერობით. ჩატარებული ანალიზებით და სუბიექტურ–ობიექტური მონაცემების შეჯერებით, შეიძლება ითქვას, რომ საშუალოდ და საშუალოდ მსუბუქი პაციენტებია, თუ დაავადება ასე გააგრძელებს მიმდინარეობას და არცერთ მათგანთან პროგრესირება არ მოხდება, გამოჯანმრთელება უფრო მალე დადგება და დატოვებენ კლინიკას,“ – ამბობს ეზუგბაია.

ამ დროისთვის თბილისის ინფექციურ საავადმყოფოში, 40 ინფიცირებული პაციენტი იმყოფება, აქედან ხუთის მდგომარეობა მძიმეა.

საქართველოში სამი აპრილის, 12:10 საათის მონაცემებით, კორონავირუსის 148 შემთხვევაა დადასტურებული. 27 პაციენტი უკვე გამოჯანმრთელდა. კარანტინის რეჟიმში 5 392 პაციენტი იმყოფება, ხოლო სტაციონალური მეთვალყურეობის ქვეშ 319.

[ნუკა სტეფნაძე, ახალციხე]