თბილისის ინფექციურ საავადმყოფოში 4 პაციენტის მდგომარეობა მძიმეა

ინფექციური საავდმყოფოს სამედიცინო დირექტორის, მარინა ეზუგბაიას განცხადებით, ორი ახლი შემთხვევა, რომელიც დაემატათ, ამერიკის კლასტერთან კონტაქტს და საფრანგეთს უკავშირდება.

„რამდენიმე დღეა სამი მძიმე პაციენტი გვყავს, ამ პაციენტებს დაემატა გუშინ ერთი მძიმე პაციენტი, იმ ორი ახალი პაციენტიდან. ამ სიმძიმეს განაპირობებს ორმხრივი მძიმე პნევმოვნია, სუნთქვის უკმარისობასთან ერთად. ასევე თანარსებული მძიმე დაავადება რკინადეფიციტური ანემიის სახით. გუშინდელის მერე მდგომარეობის პროგრესირება არ ყოფილა, სტაბილური სიტუაციაა. თუ ასე გაგრძელდა და მდგომარეობა სტაბილური დარჩა გამოსავალიც კეთილსაიმედო იქნება,“ – განაცხადა ეზუგბაიამ ჟურნალისტებთან.

რაც შეეხება სამი პაციენტის მდგომარეობას, მათ მდგომარეობას თანდართული დაავადებები ამძიმებს.

„დანარჩენი სამი პაციენტის შესახებ მოგახსენებთ: ერთი ქალბატონის მდგომარეობა, რომელსაც პნევმონიასთან ერთად ჰიპერტონული დაავდება აქვს, მდგომარეობა სტაბილურია და შეიძლება ითქვას, რომ ალბათ გადაილახა სიმძიმის პერიოდი. მეორე პაციენტთან, რომელიც ასაკოვანი ქალბატონია, გვაქვს მძიმე სიტუაცია იმ მხრივ, რომ გარდა ორმხრივი პნევმონისსა, ახლავს თანარსებული დაავადებები – ეს არის გულის უკმარისობა და მძიმე ნერვოლოგიური დაავადებები, ასევე გნვითარდა სეფსისიც, მკვეთრი გაუარსება არ შეიმჩნევა გუშინდელიდან დღემდე. მესამე მძიმე ავადმყოფთან დიაბეტის ფონზე განვითარებულია მძიმე პნევმონია, ამ პაციენტთანაც დაავადება მინიმალურად, მაგრამ მაინც პროგრესირებს,“ – ამბობს მარინა ეზუგბაია.

საქართველოში 26 მარტის 11:35 საათის მონაცემებით, კორონავირუსის 77 შემთხვევაა დადასტურებული. 10 პაციენტი გამოჯანმრთელდა. კარანტინის რეჟიმში 4 055 პაციენტი იმყოფება, ხოლო სტაციონალური მეთვალყურეობის ქვეშ 252.

21 მარტიდან ქვეყანაში მოქმედებს საგანგებო მდგომარეობა, მარნეულისა და ბოლნისის მუნიციპალიტეტები ჩაკეტილია და გამოცხადებულია კარანტინის ზონებად.

[ნუკა სტეფნაძე, ახალციხე]