'გვაქვს 4 000 ანტისხეულზე და 2 000 ანტიგენზე დამყარებული ტესტი' – თამარ გაბუნია

მისივე თქმით, იგეგმება კიდევ 2 000 ანტიგენ ტესტის დამატება.

„თითოეულ კლინიკაზე გამოყოფილია ლაბორატორია, რომელიც გარდა ლუგარის და სხვა ლაბორატორიების, გააკეთებს საკონტროლო ტესტირებას. ამ შემთხვევაში ჩვენ მოგვიწევს მხოლოდ დადებითი პასუხის გადამოწმება PCR ტესტირებით. ეს სქემა უკვე აწყობილია“, - განაცხადა თამარ გაბუნიამ.

მისივე თქმით, ახალი ალგორითმით ტესტირება ჩაუტარდება პაციენტთა სამ ჯგუფს. ესენია: პირველი – სიმპტომური პაციენტები, რომლებიც სრულად აკმაყოფილებენ საეჭვო შემთხვევის განმარტებას; მეორე – პირები, რომელთაც მოგზაურობის ანამნეზი არ აქვთ და სამედიცინო დაწესებულებებს ცხელებით მიმართავენ და მესამე – პირები რომლებიც მაღალი რისკის მქონე კონტაქტებად მოიაზრებიან. ეს ჯგუფი მოიცავს სამედიცინო პერსონალს და ორგანიზებულ ინსტიტუციურ დაწესებულებაში მყოფ პირებსაც.

გაბუნიას თქმით, ალგორითმის მიხედვით, სიმპტომების არმქონე პაციენტების შემოწმება არ არის მიზანშეწონილი და გათვალისწინებული.

ამ დროისთვის [ 14:18] საქართველოში კორონავირუსის 115 დადასტურებული და 22 გამოჯანმრთელების შემთხვევაა დაფიქსირებული.

COVID 19-ის გავრცელების გამო ქვეყნის მთელ ტერიტორიაზე გამოცხადებულია საყოველთაო კარანტინის რეჟიმი, ასევე 21:00–დან 6:00 საათამდე მოქმედებს ე.წ კომენდანტის საათი.

[რობი ზარიძე, ახალციხე]