ონლაინ–კლინიკები კვირის ბოლომდე რეგიონებშიც იქნება ხელმისაწვდომი – თამარ გაბუნია

აქამდე 112-თან დაკავშირებული ონლაინ–კლინიკები თბილისის პირველადი ჯანდაცვის ოთხ ცენტრში მოქმედებდა.

„დღეს ჩვენ უკვე ვსაუბრობთ ამ მოდელის გაფართოებაზე, მოდელი მუშაობს ძალიან ეფექტურად რაც თვალსაჩინოდ უჩვენებს იმ შედეგებს, რომელიც მან შეიძლება მოიტანოს როგორც გრიპის შემთხვევების ეფექტურად მართვის, ასევე კორონავირუსის შემთხვევების მართვის. მოდელის გაფართოება კვირის ბოლომდე მოხდება რეგიონებშიც და ასევე თბილისის კიდევ სხვა დამატებით ცენტრებში. იმის გათვალისწინებით, რომ შეიძლება ზარების რაოდენობამ მოიმატოს,“ – განაცხადა თამარ გაბუნიამ.

ჯანდაცვის მინისტრის მოადგილის თქმით, მოხდა 24 კლინიკის იდენტიფიცირება და მედიკოსების ტრენინგიც დასრულებულია. გაბუნიას განმარტებით, ამ ეტაპზე ასევე გადამზადებულია 100 ექიმი.

„ტრენინგები გუშინ პრაქტიკულად დასრულდა. ამ კვირაში კიდევ დაზუსტდება დამატებითი დეტალები ტესტირების შემდეგ და სისტემა იქნება სრულად მზად იმისთვის, რომ პასუხი გასცეს ყველა შეკითხვას, რაც დაუკავშირდება ცხელების შემთხვევაში პაციენტის წუხილს და მისცემს მას სწორ მიმართულებას: დარჩეს ბინაზე, დაუკავშირდეს ისევ სასწრაფოს, თუ საჭიროა დაუყოვნებლივ გადაყვანა ცხელების კლინიკაში, ან კორონავირუსიანებისთვის განკუთვნილ კლინიკაში“, – ამბობს გაბუნია.

საქართველოში 31 მარტის 16:30 საათის მონაცემებით კორონავირუსის 110 შემთხვევაა დადასტურებული, 21 პაციენტი უკვე გამოჯანმრთელებულად მიიჩნევა. კარანტინის რეჟიმში 4 995 პაციენტი იმყოფება, ხოლო სტაციონალური მეთვალყურეობის ქვეშ 278.

[ნუკა სტეფნაძე, ახალციხე]