სწრაფი ტესტის გაკეთებასაც ექიმის დანიშნულება სჭირდება - ჯანდაცვის მინისტრის მოადგილე

„დაავადებათა კონტროლის ცენტრი განაგრძობს ამ ტესტების გამოყენებას. რასაც აქამდე იყენებდა, რაც შეეხება ანტიგენზე დამყარებულ ტესტებს, რომელიც ასევე ჩინეთიდან მოდის, მაგრამ ეს არის ის მოდელი, რაც სამხრეთ კორეაში იყო გამოყენებული, ვფიქრობთ, რომ ჩამოვა კვირის ბოლოს. ხვალ უკვე დაიწყება ტესტების ტრანზიტი ჩინეთიდან, შემდეგ ველოდებით ეტაპობრივად დამატებითი რაოდენობას და ის 200 000 ტესტი, რაც იყო დაანონსებული უკვე აპრილში იქნება. შემდეგ უკვე გვექნება შესაძლებლობა ამ ტესტების გამოყენება მეტად გაფართოვდეს,“ – განაცხადა თამარ გაბუნიამ ჟურნალისტებთან.

მინისტრის მოადგილემ ასევე აღნიშნა, რომ ახალი სწრაფი ტესტები, რომლებიც საქართველოში ჩინეთიდან შემოდის მხოლოდ ექიმის დანიშნულებით გამოიყენება.

„აუცილებლად უნდა გქონდეთ ექიმის დანიშნულება. ტესტები გამოიყენება მიზნობრივად. ის ძვირფასი რესურსი, რაც გვაქვს ჩვენ ტესტის სახით არ უნდა გაცდეს ისე, რომ მოქალაქეც დამშვიდდეს უსაფუძვლოდ, რომ მას ტესტი უარყოფითი აქვს, და ამავე დროს კვალავ მაღალი რისკის ქვეშ დარჩეს. ამდენად ეპიდემიოლოგიური და საექიმო შეფასება აუცილებელია ტესტის ჩასატარებლად. ძალიან გთხოვთ, ნუ გვექნება იმის მოლოდინი, რომ როდესაც ტესტები ქვეყანაში შემოვა, შეგვიძლია მარტივად მივიდეთ და გავიკეთოთ ტესტი. ამას სჭირდება წინაპირობა და ექიმის შეფასება“, - განაცხადა გაბუნიამ.

ჯანდაცვის მინისტრის მოადგილის თქმით, სწრაფი ტესტირების დაწყება მომდევნო კვირიდან იგეგმება, როდესაც უკვე ანტიგენზე დამყარებული ტესტები ჩამოვა ქვეყანაში.

საქართველოში 24 მარტის მონაცემებით კორონავირუსის 67 შემთხვევაა დადასტურებული. 9 პაციენტი უკვე გამოჯანმრთელებულად მიიჩნევა. ქვეყანაში მოქმედებს საგანგებო მდგომარეობა, მარნეულისა და ბოლნისის მუნიციპალიტეტები ჩაკეტილია და გამოცხადებულია კარანტინის ზონებად.

[sknews.ge]