‘შეიძლება პიკი არც არასდროს მივიღოთ’ – თამარ გაბუნია კორონავირუსის შემთხვევებზე

„სხვადასხვა მოდელი ამბობს, რომ თუ არაფერს არ გავაკეთებთ, პიკი მოსალოდნელია პირველი შემთხვევების გამოვლენიდან, მეშვიდე მერვე კვირაზე. ამ შემთხვევაში ჩვენ უნდა გავითვალისწინოთ, რომ არის ძალიან აქტიური სოციალური დისტანცირება, მთელი რიგი ღონისძიებები. ამდენად მეშვიდე, მერვე კვირის პიკი დიდი ალბათობით გადავადდება და შეიძლება არც არასდროს მივიღოთ ეს პიკი. ჩვენი დიდი მიზანიც ეს არის, თუ იქნება შემთხვევების მატება, იყოს ეტაპობრივი, ნელი და თანმიმდევრული“, – განუცხადა ჟუნალისტებს გაბუნიამ.

ჯანდაცვის მინისტრის მოადგილემ ასევე აღნიშნა, რომ ჯერჯერობით საბედნიეროდ ინფიცირებულთა ყველა კლასტერი კონტროლდება.

საქართველოში 24 მარტის მონაცემებით კორონავირუსის 70 შემთხვევაა დადასტურებული. 9 პაციენტი უკვე გამოჯანმრთელებულად მიიჩნევა. კარანტინის რეჟიმში 4055 პაციენტი იმყოფება, ხოლო სტაციონალური მეთვალყურეობის ქვეშ 252. ქვეყანაში მოქმედებს საგანგებო მდგომარეობა, მარნეულისა და ბოლნისის მუნიციპალიტეტები ჩაკეტილია და გამოცხადებულია კარანტინის ზონებად.

[sknewsge]