‘საქართველოში 40-მდე კლინიკა მზად არის ცხელებიანი პაციენტების მისაღებად’ – თამარ გაბუნია

„უკანასკნელ ხანებში ჩვენ გვქონდა პრობლემა კლინიკებთან ცხელებიანი პაციენტების მიღებაზე და ხდებოდა გადამისამართება ცენტრალიზებულ კლინიკებში, თუმცა რაიონული დონის კლინიკები არიან შესაფერისად აღჭურვილი იმისთვის, რომ მათ უსაფრთხოდ მიიღონ და გაუწიონ საწყისი შეფასება და ტირაჟი იმ პაციენტებს, ვინც ცხელებით და რესპირატორული სიმპტომებით მათ მიმართავს. სწორედ ამიტომ უკვე იდენტიფიცირებულია რაიონული დონის კლინიკები, ვინც გამოყოფს ცხელების ზონას, ან თუ ამის გაკეთება შეუძლებელია, განტვირთავს საავადმყოფოს სხვა პაციენტების გადანაწილების გზით, იმგვარად რომ სრულად მოემსახუროს მხოლოდ პაციენტებს ცხელებით. ასეთი არის ყველა რაიონულ ცენტრში, ჯამში გამოდის 40-მდე კლინიკა. ზოგიერთი რაიონული ცენტრის კლინიკა იმდენად პატარაა, რომ იქ ერთზე მეტი პაციენტის დაყოვნება ვერ მოხერხდება და ასეთ შემთხვევაში მაქსიმალურად შევეცდებით გადავამისამართოთ პაციენტები დროულად უახლოეს რაიონულ კლინიკებში,“ – განაცხადა გაბუნიამ.

როგორც, გაბუნია ამბობს დიდი კლინიკები უკვე მობილიზებულები არიან რათა მიიღონ მხოლოდ კორონავირუსით დაინფიცირებული პაციენტები.

„რაც შეეხება დიდ კლინიკებს, რომლებიც მობილიზირებულები არიან უკვე დიდიხანია იმისთვის, რომ მართონ, მხოლოდ კორონავირუსით დაინფიცირებული პაციენტები, ასეთი კლინიკებიც მზადყოფნაში არიან და შემთხვევების მატებასთან ერთად უზრუნველყოფენ პაციენტების მიღებას და ჩაუტარებენ შესაბამის მკურნალობას. ასეთი კლინიკები იდენტიფიცირებულია: თბილისში, ქუთაისში, გორში, ზუგდიდში, ბათუმში ანუ რეგიონალურად მოცვა არის საკმაოდ დიდი,“–ამბობს გაბუნია.

საქართველოში 31 მარტის 14:30 საათის მონაცემებით კორონავირუსის 110 შემთხვევაა დადასტურებული. 21 პაციენტი უკვე გამოჯანმრთელებულად მიიჩნევა. კარანტინის რეჟიმში 4 995 პაციენტი იმყოფება, ხოლო სტაციონალური მეთვალყურეობის ქვეშ 278.

[ნუკა სტეფნაძე, ახალციხე]