‘შაბათ-კვირიდან ახალი ალგორითმით ვიწყებთ მოქმედებას’ - მინისტრი

როგორც ეკატერინე ტიკარაძემ დღეს, 30 აპრილს გამართულ ბრიფინგზე განაცხადა, ახალი ალგორითმის მზაობისა და მისი გაფართოებული შესაძლებლობების შესახებ ლაბორატორიის ჯგუფის შეხვედრაზე ისაუბრეს.

„ალგორითმის გაფართოებას დაექვემდებარებიან ის თავშესაფრები, რომლებიც იყო ჩამოთვლილი, ასევე სატრანზიტო მანქანების მძღოლები, ვინაიდან ისინი წარმოადგენენ საკმაოდ მაღალი რისკის ჯგუფს. ვისაუბრეთ ასევე ინიციატივაზე, რომელიც სამინისტროში არის შემოსული სამედიცინო საზოგადოებიდან, თუ იქნება შესაძლებელი რომ ყველა კლინიკაში მოხდეს პაციენტების მიღებისას მათი კვლევა. ამ ინიციატივას ჩვენ კვლავ მოვუბრუნდებით და განვიხილავთ, ამ ეტაპისთვის, ვფიქრობთ, რომ შესაძლებელი იქნება არა ანტიგენით, არამედ ანტისხეულით პაციენტების ტესტირება. ორ დღეში უკვე იქნება გაფართოებული ალგორითმი და შესაბამისად, უკვე შაბათ-კვირიდან ჩვენ ახალი ალგორითმით მოქმედებას დავიწყებთ“, - განაცხადა ტიკარაძემ.

მისივე თქმით, კვლავ ძალაში რჩება ექიმის მხრიდან დეტალური ანალიზის გაკეთება, შეგროვება და მხოლოდ ამის შემდეგ პაციენტის მიზნობრივი ტესტირება.

„ვინაიდან კოვიდის ინფექციის ყველა სიმპტომის დაფიქსირება და გამოვლენის ეტაპი სხვადასხვა ტესტით ხერხდება, ჩვენთვის მნიშვნელოვანია, რომ ყველა ტესტის სახეობა იყოს გამოყენებული ეფექტიურად. სავარაუდოდ, გადაწყვეტილება, რომელზეც საბჭო ჯერ კიდევ მსჯელობს, მიღებული იქნება არა ანტიგენით, არამედ ანტისხეულით პაციენტის კლინიკებში კვლევაზე“.

ტიკარაძე ამბობს, რომ სოციალური დისტანცირების მკაცრი დაცვა სახელმწიფოს მხრიდან კვლავ ძალაში რჩება, რადგანაც დღევანდელი კორონავირუსის გავრცელების მაჩვენებლები მოდუნების საშუალებას არ იძლევა: „კოვიდინფექციის დაფიქსირების კონტროლირებადი ზრდა გვაქვს დღეის მდგომარეობით, მაგრამ ეს ისევე, როგორც საქართველოს, სხვა ქვეყნებსაც არ აძლევს მოდუნების საშუალებას. ჩვენმა მოქალაქეებმა აუცილებლად უნდა დაიცვან ყველა ის მოთხოვნა, რომელიც სახელმწიფოს მხრიდან არის დადგენილი“.

[თაკო ფეიქრიშვილი]