თბილისის ინფექციურ საავადმყოფოს კიდევ ერთი მძიმე პაციენტი დაემატა

„დაგვემატა კიდევ ერთი ახალი მძიმე პაციენტი, შემოყვანისას მისი მდგომარეობა იყო საშუალოზე მძიმე მაგრამ დაავადებამ განიცადა პროგრესირება, მიუხედავად დაწყებული მკურნალობისა, მისი მდგომარეობა ამ ეტაპზე მძიმეა, მაგრამ არა კრიტიკული“, – განაცხადა მარინა ეზუგბაიამ.

მისი თქმით, დანარჩენი ოთხი მძიმე პაციენტის მდგომარეობა არის უცვლელი, „იცით თქვენ, რომ ამ ოთხიდან ორი გვყავს კრიტიკული რომელთა სტაბილიზება ჯერ ვერ მოხერხდა, თუმცა დანარჩენი ორის სტაბილიზაცია არის. ალბათ რამოდენიმე დღე დავაკვირდებით და ვიტყვით პროგნოზურად გამოსავალი როგორი გვექნება“.

როგორც, ეზუგბაიამ ჟურნალისტებს განუცხადა, დღეს, პირველ აპრილს მათ კლინიკას კორონავირუსით ინფიცირების ორი ახალი შემთხვევა დაემატა, რომელთა კონტაქტებიც ცნობილია. მისივე განმარტებით, covid 19–ით ინფიცირებული 115 პაციენტი საქართვლოს მასშტაბით ცხრა კლინიკაშია გადანაწილებული.

„გუშინ დილით იყო 108 პაციენტზე დადასტურებული შემთხვევა, დღეს დილის მონაცემებით გვყავს 115. ანუ დილიდან დღემდე დაგვემატა შვიდი შემთხვევა, აქედან ორი არის ჩვენს ცენტრში. დანარჩენი არის covid-ის მიმღებ ცხრა ცენტრში.

ეზუგბაიას განცხადებით, 115 ინფიცირებული პაციენტიდან, მათ ცენტრში 51 გადის მკურნალობას, აქედან 32 პაციენტს კორონავირუსი აქვს.

საქართველოში კორონავირუსის შემთხვევა პირველად 26 თებერვალს დაფიქსირდა. ვირუსის პირველი შემთხვევის გამოვლენიდან, ერთ თვეზე მეტი გავიდა, ამ დრომდე ქვეყანაში გარდაცვალების ფაქტი არ ფიქსირდება.

[ნუკა სტეფნაძე, ახალციხე]