'საერთაშორისო გამჭვირვალობა' საპრეზიდენტო არჩევნებს აფასებს

დამკვირვებლებს ადმინისტრაციული რესურსის გამოყენების ფაქტი არ დაუფიქსირებიათ. არ ყოფილა პოლიტიკური პარტიების წევრებისა და აქტივისტების მხრიდან ამომრჩეველზე ზეწოლის ფაქტიც.

„საერთაშორისო გამჭვირვალობა - საქართველო“ პოზიტურად აფასებს იმ ფაქტს, რომ ე.წ. სპეცუბნები მხოლოდ სპეციალური რეჟიმის ქვეშ მყოფი სამხედრო თუ პოლიციის თანამშრომლებისთვის იყო გახსნილი და მათში მხოლოდ ყაზარმულ მდგომარეობაზე მყოფი მოსამსახურეები აძლევდნენ ხმას.

რაც შეეხება დარღვევებს, ორგანიზაციის ინფორმაციით, დარღვევების უმრავლესობა პროცედურული ხასიათის იყო. ყველაზე მეტი დარღვევა საარჩევნო დღის დასაწყისში დაფიქსირდა, დღის მეორე ნახევარში კი დარღვევების რიცხვმა საგრძნობლად იკლო.

27 ოქტომბრის არჩევნებზე „საერთაშორისო გამჭვირვალობა - საქართველომ“ საქართველოს მასშტაბით 80-მდე პროცედურული დარღვევა დააფიქსირა. ორგანიზაციის დამკვირვებლებმა კი 36 საჩივარი დაწერეს.

„საერთაშორისო გამჭვირვალობა საქართველოს“ დაფიქსირებულ დარღვევებს შორის იყო:
დამკვირვებლების არ შეშვება უბანზე;
მარკირების პროცედურების დარღვევით ხმის მიცემის შემთხვევები;
ხარვეზიანი სიები;
ხმის მიცემა შესაბამისი დოკუმენტაციის გარეშე;
ბეჭდების პრობლემა;
გადასატან ყუთთან დაკავშირებული დარღვევები;
საარჩევნო პროცესის დროებითი შეფერხება.

[sknews.ge]