საიამ 20 საჩივარი და 40-ზე მეტი შენიშვნა დააფიქსირა

საია არჩევნებს თბილისისა და რეგიონების 36 საარჩევნო ოლქში აკვირდება. მათი განცხადებით, კენჭისყრის პროცესი მშვიდ ვითარებაში მიმდინარეობს.

საიაში ამბობენ, რომ მათ მიერ დაფიქსირებული დარღვევები ძირითადად საარჩევნო კანონმდებლობის უცოდინრობითაა განპირობებული.

დარღვევებს შორისაა საკონტროლო ფურცლების შევსებასთან და გადასატანი ყუთის სიასთან დაკავშირებული პრობლემები; დამკვირვებელთა შორის ფიზიკური დაპირისპირების ფაქტი; პრობლემები საჩივრის ჩაბარებასთან დაკავშირებით; არასათანადო დოკუმენტებით ხმის მიცემა; წილისყრის პროცედურების დარღვევები; ხმის მიცემის პროცედურის სხვაგვარი დარღვევა, მაგალითად: რუსთავის ოლქის #27-ე უბანზე გამოკრული იყო განცხადება, საარჩევნო სუბიექტის- აკაკი ასათიანის მიერ კანდიდატურის მოხსნის თაობაზე. საიას დამკვირვებლის შენიშვნის გათვალისწინებით დარღვევა აღმოიფხვრა. დარღვევას ჰქონდა ადგილი ასევე დიდუბის ოლქის #4 უბანზე, სადაც კენჭისყრის კაბინაში კანდიდატების ჩამონათვალში შემოხაზული იყო ნინო ბურჯანაძე. საიას დამკვირვებლის მოთხოვნით დარღვევა აღმოიფხვრა.

"ასევე, კენჭისყრის პროცესის სხვა მნიშვნელოვანი დარღვევები: ფიქსირდება შემთხვევები, როდესაც ადგილობრივი სადამკვირვებლო ორგანიზაციები საარჩევნო უბნებზე ერთზე მეტი დამკვირვებლით არიან წარმოდგენილნი, რაც კანონდარღვევაა. მსგავსი ფაქტები ფიქსირდება ჩუღურეთის და დიდუბის ოლქებში ეს ორგანიზაციებია „ყოფილი პოლიტპატიმრები ადამიანის უფლებებისთვის“, „მწვანე დედამიწა“, „თავისუფალი არჩევანი“, „ადვოკატთა და იურისტთა საერთაშორისო ობსერვატორია.“

საბურთალოს ოლქის #73 უბანზე 9:00 საათისთვის საარჩევნო უბნის მიმდებარე ტერიტორიაზე მობილიზებული იყვნენ პირები, რომლებიც აწარმოებენ მოსული ამომრჩევლის აღრიცხვას. განვმარტავთ, რომ აღნიშნული წარმოადგენს ამომრჩევლის ნების გამოვლენაზე ირიბ კონტროლს და მიზანშეუწონელია", - ნათქვამია საიას განცხადებაში.

15:00 საათისთვის საიას დამკვირვებლებმა დაწერეს 20 საჩივარი და 40-ზე მეტი შენიშვნა დააფიქსირეს ჩანაწერთა წიგნში.

27 ოქტომბერს საპრეზიდენტო არჩევნების დღეს საია თბილისისა და 8 რეგიონის 36 საარჩევნო ოლქში 400-ზე მეტი დამკვირვებლით აკვირდება.

[Sknews.ge]