'ყველას კარზე აკაკუნებს კორონავირუსი' – ამერიკაში ქართული ეპარქია წირვას მრევლის გარეშე აღავლენს

ამის შესახებ ტელეკომპანია „პირველის“ ეთერში მეუფე საბა ინწკირველმა ისაუბრა.

მისი თქმით, ვიდრე ამ გადაწყვეტილებას მიიღებდნენ, არსებობდა შეზღუდვები წირვა-ლოცვების დროს, მათ შორის დეზინფექცია უკეთდებოდა ზიარების კოვზსაც.

„ეს არ არის ახალი წესი, ბევრი სამრევლო, სასულიერო პირი იყენებს ამ წესს და ასე აზიარეებს მორწმუნეებს“, – ამბობს საბა ინწკირველი.

მეუფეს განმარტებით, გადაწყვეტილების მიღების ერთ-ერთი მიზეზი, ისიცაა, რომ ამერიკაში კორონავირუსით ინფიცირებული ქართველებიც არიან.

ჟურნალისტის კითხვაზე, თუ რას ეტყოდა საქართველოში მოღვაწე სასულიერო პირებს, მეუფემ უპასუხა, რომ ახლა მხოლოდ სახლში ლოცვით შეგვიძლია ერთმანეთის გადარჩენა.

„ჩემთვისაც არ იყო ადვილი ამ გადაწყვეტილების მიღება, რომ მეთქვა ჩემი მრევლისთვის სახლიდან დარჩენილიყვნენ და ელოცათ მაგრამ დღეს სწორედ ეს არის ყველაზე მთავარი მოთხოვნა ერთი რამისთვის– ჩვენ გადავარჩინოთ ადამიანების სიცოცხლე. ჩვენ ვზრუნავთ ადამიანებზე. ეკლესია არის ადამიანების შესაკრებელი, მაგრამ დღეს უჭირს ადამიანს და არ ვიცით რამდენით გაიზრდება კიდევ დაინფიცირებულთა რიცხვი. ყველას კარზე აკაკუნებს დღეს კორონავირუსი. ჩემი მოწოდება იქნება რომ დღეს, ჩვენ რომ ერთმანეთი გადავარჩინოდ, სწორედ სახლის პირობებში უნდა გავხადოთ ეკლესია, ოჯახის პირობებში უნდა ვილოცოთ, რომ გადავარჩინოთ ერღმანეთი“ - განაცხადა მეუფემ ტელეკომპანია „პირველის“ ეთერში.

საქართველოს სამოციქულო მართლმადიდებელი ეკლესია ჩრდილოეთ ამერიკაში, აშშ-სა და კანადაში ქართულ სამრევლოებს აერთიანებს.

ამ დროისთვის ვირუსს 195 ქვეყანაში ებრძვიან. Covid-19 - ით მსოფლიოში 382 568 ადამიანია ინფიცირებული, აქედან გარდაცვლილია 16 578.
ვირუსის გამო საქართველოს მთელს ტერიტორიაზე საგანგებო მდგომარობა, მარნეულისა და ბოლნისის მუნიციპალიტეტში კი კარანტინია გამოცხადებული.

[რობი ზარიძე, ახალციხე]