საქართველოს საპატრიარქომ ზიარების წესი არ შეცვალა

საქართველოს საპატრიარქოში სინოდის სხდომა დღეს, 20 მარტს გაიმართა.

„ჩვენ მიგვაჩნია, პირადად მე მიმაჩნია და სინოდში არავითარი აზრთა სხვადასხვაობაა არაა, ეჭვის შეტანა იმაში, რომ ზიარების საერთო კოვზით შეიძლება, ინფექცია გადაედოს ვინმეს, ეს არის ყოვლად გამორიცხული. შესაბამისად, ამას რაც შეეხება, არავითარი ცვლილება არ შეიძლება იყოს“, – განაცხადა მეუფე ნიკოლოზმა.


რაც შეეხება ღვთისმსახურების ჩატარებას, მისი თქმით, საპატრიარქოს რეკომენდაციაა, რომ ეკლესიებმა ღვთისმსახურება გაახმოვანოს.

„ცვლილება იქნება სასიკეთო, ის, რომ ესეთი რეკომენდაცია გვექნება, ეს თანხებთანაა დაკავშირებული, მაგრამ შეძლებისდაგვარად ყველა ტაძართან, რომ მოახერხონ მსახურების გახმოვანება, რათა არ იყოს სიმჭიდროვე. ჩვენი რეკომენდაციებია, დაიცვან ჯანდაცვის სამინისტროსა და საერთოდ, ჯანდაცვის რეკომენდაციები მორწმუნეებმა. სინოდზე მე პირადად განვაცხადე, მე მინდა, ყველას მოვუწოდო, მრევლს და ყველა ადამიანს და შემოგთავაზებთ ასეთ დევიზს – არ გადასდო და არ გადაგედება.ასაკოვან ადამიანებს, საეჭვო ჯანმრთელობის მქონე პირებს და იმათ, ვისაც ეს ვირუსი დაუდგინდათ, თუ მათი თხოვნა იქნება, ჩვენ ყველგან მივალთ და ნებისმიერ მსახურებას შევასრულებთ საკუთრივ მათთვის.

ჩვენ ვართ საქართველოს მართლმადიდებელი ეკლესია და ჩვენ ვართ მართლმადიდებელი ეკლესიის ოჯახის წევრი. ავკოკეფალია ნიშნავს, რომ ჩვენს ტერიტორიაზე ყველა გადაწყვეტილებას ვღებულობთ დამოუკიდებლად. სხვა ქვეყნების ტერიტორიაზე მიღებულ წესებზე ვერ გავაკეთებთ კომენტარს. ჩვენს დადგენილ წესებს, არავისთან ვათანხმებთ. იმაში, რომ საიდუმლოება მადლმოსილია და საფრთხეს არ შეიცავს, არავითარი აზრთა სხვადასხვაობა არ ყოფილა “, – განაცხადა ჟურნალისტებთან მეუფე ნიკოლოზმა.

[sknews.ge]