ბორჯომ – ბაკურიანის მეუფემ ეპარქია დატოვა

დღეს, 24 აპრილს ბორჯომის ღვთისმშობლის სახელობის ტაძარში საზეიმო წირვა ახალციხისა და ტაო–კლარჯეთის მიტროპოლიტმა მეუფე თეოდორემ აღავლინა. წირვის დასრულების შემდეგ კი ტაძარში შეკრებილ მრევლს, მეუფე სერაფიმეს ეპარქიდან წასვლის შესახებ ინფორმაცია მიაწოდა.

მისი თქმით, მეუფე სერაფიმემ ეპარქიიდან გათავისუფლების შესახებ სრულად საქართველოს კათოლიკოს პატრიარქს ილია მეორეს თავად სთხოვა.

„ძალიან რთულია რაიმე გითხრათ და ძალიან რთულია რაიმეთი განუგეშოთ. მთავარია ჩვენ არ უნდა გავიშვიროთ თითი ვინმესკენ და არ უნდა ვთქვათ, რომ ვიაღაცა იყო ამაში დამნაშავე. ან თვითონ მეუფე სერაფიმესკენ არ უნდა გავიშვიროთ თითი, რომ ის იყო დამნაშავე. ყველამ საკუთარ თავში უნდა ვეძიოთ და აღმოვაჩინოთ ის რაღაცა მარცვალი, რომელმა მარცვალმაც ხელი შეუწყო ამ ნაბიჯის გადადგმას. ნუ დაიწყებთ იმის ჩიჩქვნას და გამოძიებას თუ ეს რატომ მოხდა. ღვთის განგებულებაში ჩვენ ვერ ჩავწვდებით დღეს, მაგრამ ის ხვალ, ზეგ, მაზეგ თავისთავად განცხდდება. უნდა გადავიტანოთ ეს დარტყმა უნდა გადავიტანოთ ეს განსაცდელი“, – ამ სიტყვებით მიმართა მრევლს მეუფე თეოდორემ.

რა გახდა მეუფე სერაფიმეს გადაწყვეტილების მიღების მიზეზი ამ ეტაპზე უცნობია. საქართველოს საპატრიარქოში „სამხრეთის კარიბჭესთან“ კომენტარი არ გააკეთეს.

მეუფე სერაფიმე ბორჯომ – ბაკურიანის ეპარქიაში 21 წლის განმავლობაში მოღვაწეობდა.

[sknews.ge]