სომხური სამოციქულო ეკლესია წირვას მრევლის გარეშე ჩაატარებს

სომეხი სასულიერო პირების განცხადებით, ეკლესია მრევლისთვის ღია იქნება 9:00–დან 19:00 საათამდე. წირვის დროს კი კარი დაიხურება. შეზღუდვა ცხრა აპრილამდე გაგრძელდება.

დროებით გაუქმდა ქორწინებისა და ნათლობის ცერემონიებიც. დაკრძალვის შემთხვევაში ცერემონია მხოლოდ საფლავზე შესრულდება.

„დღეს, 18 მარტს 19:00 საათზე წირვას ჩავატარებ მარტო. ილოცეთ სადაც ხართ და უფალს ვთხოვოთ, რომ ერთად გადავლახოთ ყველაფერი“,– ამბობს მღვდელი თორგომ ვარდანიანი.

ცნობისთვის, კორონავირუსის პრევენციის მიზნით, მუსლიმურმა თემმა ლოცვის წესებში ცვლილებები შეიტანა. ზიარების წესი შეცვალა საქართველოს კათოლიკე ეკლესიამაც.
საქართველოს საპატრიარქოს გადაწყვეტილებით, ღვთისმსახურება ტაძრებში აღევლინება ჩვეული წესით, თუმცა მრევლი ზიარების შემდგომ სასმელს საკუთარი ან ერთჯერადი ჭიქებით მიიღებს.

გარდა ამისა, უსაფრთხოების მიზნით, ეკლესიებში სადეზინფექციო სამუშაოები ჩატარდა.

[რიმა სარუხანიან, ახალციხე]