სააღდგომო წირვას სომხურ სამოციქულო ეკლესიებში მრევლის გარეშე აღავლენენ

12 აპრილს, სომხური სამოციქულო ეკლესია აღდგომის დღესასწაულს აღნიშნავს. არქიმანდრიტ ამირიანის გადაწყვეტილებით, სააღდგომო ღვთისმსახურება, ასევე დიდი შვიდეულის, ანუ აღდგომამდე კვირის ყველა ლიტურგია, კარს მიღმა, მრევლის დაუსწრებლად ჩატარდება.

კორონავირუსის პანდემიასთან დაკავშირებით, ეკლესიის არქიმანდრიტმა უკვე ხუთი დეკრეტი გამოსცა:

დიდ ხუთშაბათს, იგივე „უფლის სერობის“ წირვას, არ შესრულდება ტრადიციული ფეხთბანვის რიტუალი.

წითელი პარასკევის მსახურებას, ჯვრის თაყვანისცემის აქტში, ჯვარს ემთხვევა მხოლოდ ის პირი, რომელიც მსახურებას აღასრულებს.

რაც შეეხება სააღდგომო ღამისთევის ლიტურგიას, დეკრეტის მიხედვით ყველა სასულიერო პირი ვალდებულია გაითვალისწინოს „კომენდანტის საათი“ და წირვა შესაბამისად აღავლინოს.

„დიდ შაბათს ღამისთევის საპასექო წირვას ადრე აღვავლენთ, ჩავატარებთ ცეცხლის ანთების რიტუალს და ცეცხლს სამოციქულო ეკლესიის ეზოში დავტოვებთ, 16:00 საათიდან 20:00 საათამდე მორწმუნეებს შეეძლებათ საგანგებო მდგომარეობის წესების დაცვით მოვიდნენ ეკლესიაში და ცეცხლი სახლში წაიღონ“ , – გვითხრა ახალციხის სამოციქულო ეკლესიის მღვდელმა თორგომ ვარდანიანმა.

მისივე თქმით, რაც შეეხება აღდგომის დღეს, სომხური სამოციქულო ეკლესიები ღია იქნება 10:00–დან 20:00 საათამდე: „საგანგებო მდგომარეობის წესების მკაცრად დაცვით, მრევლს შეეძლება მოვიდეს ეკლესიაში (არა ჯგუფებად) და მიიღონ კურთხევა და წმიდა ზიარება“.

არქიმანდრიტის დეკრეტის საფუძველზე, 17 მარტიდან ტაძრებში წირვა მრევლის გარეშე მიმდინარეობს.

ხუთ აპრილს, მრევლის გარეშე აღევლინა ბზობის სადღესასწაულო წირვაც.

[რიმა სარუხანიან, ახალციხე]