'ოცნება' წინასაარჩევნო კამპანიას აგრძელებს ®

„ქართული ოცნების“ ახალციხის შტაბის წევრები დღეს სოფელ სხვილისს, გუშინ კი სოფელ წყალთბილას სტუმრობდნენ.

მოსახლეობასთან შეხვედრებს, „ქართული ოცნების“ ახალციხის შტაბის ხელმძღვანელები, ტრადიციულად, ბოლო ერთი წლის განმავლობაში განვითარებულ მოვლენებზე საუბრით იწყებენ. აქვე, „ნაციონალური მოძრაობის“ მმართველობის 9-წლიან პერიოდსაც იხსენებენ.

„ამით მოსახლეობას ვეუბნებით, რომ ის რაც იყო მაშინ, უნდა დამთავრდეს, ყველაფრის გამოსწორება შეიძლება“, - ამბობს „ქართული ოცნების“ ახალციხის შტაბის უფროსი მალხაზ ჟუჟუნაძე.

შტაბის წევრები შეკრებილებს „ქართული ოცნების“ შესახებ სარეკლამო მასალებს, ვიდეოკოლაჟს, გაზეთებს, აცნობენ და გიორგი მარგველაშვილის მხარდაჭერისკენ მოუწოდებენ.

კანდიდატის პროგრამის ძირითადი მიმართულებების გაცნობის შემდეგ, შტაბის ხელმძღვანელები ადგილობრივების პრობლემებს ისმენენ.
„ხმა მიეცით საქართველოს მომავალს და წინსვლას, შემოხაზეთ 41“, - ასეთია მესიჯი, რომელსაც შტაბის წევრები სოფლებში ავრცელებენ.

მალხაზ ჟუჟუნაძე ამბობს, რომ ახალციხის მუნიციპალიტეტში არსებულ თითქმის ყველა სოფლის მოსახლეობას შეხვდნენ. დარჩენილია რამდენიმე სოფელი, სადაც „ოცნება“ კიდევ ერთხელ მივა.


„ხვალიდან დავიწყებთ იმ სოფლებში გასვლას, სადაც მეტ-ნაკლებად ჩავარდნები გვქონდა. აღნიშნული სოფლების ზონის უფროსებმა, მოადგილეებმა და აგიტატორებმა ვერ განახორციელეს ისეთი სააგიტაციო მუშაობა, როგორიც უნდა განეხორციელებინათ. ამიტომ, კიდევ ერთხელ დავგეგმავთ შეხვედრებს, რათა კარგად გავაცნოთ გიორგი მარგველაშვილის საარჩევნო პროგრამა“, - ამბობს ჟუჟუნაძე.

[sknews.ge]