ჟუჟუნაძის თქმით, 'ოცნების' შტაბს კოპაძე უხელმძღვანელებს, კოპაძე კი აღნიშნულს უარყოფს

დღეს, 21 თებერვალს, „ქართული ოცნების“ ახალციხის საარჩევნო შტაბის ყოფილმა ხელმძღვანელმა მალხაზ ჟუჟუნაძემ განაცხადა, რომ საარჩევნო შტაბს, რომელიც ადგილობრივი თვითმმართველობის არჩევნების წინ იქმნება, გიორგი კოპაძე უხელმძღვანელებს.

ჟუჟუნაძე ამბობს, რომ ეს გადაწყვეტილება „ქართული ოცნება - დემოკრატიული საქართველოს“ პოლიტიკურმა საბჭომ რამდენიმე დღის წინ მიიღო.

„მე ვარ პარტიის წევრი და არსად არ მივდივარ. თუმცა, შტაბის ახალ ხელმძღვანელს გვერდში დავუდგები და დავეხმარები. ჩვენს შორის ეს საუბარი შემდგარია, საქმის კურსშია პოლიტსაბჭოც, - ამბობს მალხაზ ჟუჟუნაძე და ამატებს, რომ ახალციხეში პარტია ჩამოყალიბების პროცესშია: ამ პროცესს ხელმძღვანელობს პოლიტიკური საბჭო და პარტიის პოლიტიკური მდივანი გიორგი ვოლსკი, ის ალბათ ახალციხეშიც ჩამოვა და ჩატარდება პარტიული კონფერენციაც. შესაბამისად, მოხდება ბიუროს წევრებისა და თავმჯდომარის არჩევა“.

ამ ინფორმაციას არ ადასტურებს გიორგი კოპაძე და ამბობს, რომ ჯერ გადაწყვეტილი არაფერია.

„ჯერ საარჩევნო შტაბები არ შექმნილა, არჩევნების თარიღი დღეს გამოცხადდა. მე რატომ ვიქნები აუცილებლად ხელმძღვანელი?! არც „ქართულ ოცნებაში“ ვყოფილვარ. ჯერ არაფერი ამის შესახებ არ გადაწყვეტილა, მაგრამ თუ გადაწყდება, გაცნობებთ“, - განაცხადა გიიორგი კოპაძემ.

[თამარ თოთაძე, ახალციხე]