"ქართული ოცნება" ახალციხეში მარგველაშვილის დასახვედრად ემზადება (R)

ახალციხის მუნიციპალიტეტის სოფელებში: აგარასა და აწყურში „ქართული ოცნების“ ახალციხის შტაბის წევრებმა საინფორმაციო აქცია გამართეს. აქციაზე მოსახლეობას აქტიურობისკენ მოუწოდეს და აცნობეს, რომ 12 სექტემბერს ახალციხეს „ქართული ოცნების“ პრეზიდენტობის კანდიდატი გიორგი მარგველაშვილი ესტუმრება და მოსახლეობასთან შეხვედრას გამართავს.

„დღეს შევხვდით აგარისა და აწყურის მოსახლეობას, მათგან მოვისმინეთ პრობლემები, ვისაუბრეთ ამ პრობლემების გადაჭრის გზებზე. თუმცა, ჩვენი ვიზიტის მთავარი მიზანი იყო ის, რომ მოსახლეობისთვის მიგვეწოდებინა ინფორმაცია 12 სექტემბერს ჩვენი პრეზიდენტობის კანდიდატის სტუმრობის შესახებ“, - ამბობს „ქართული ოცნების“ ახალციხის შტაბის უფროსი მალხაზ ჟუჟუნაძე.



მსგავსი შეხვედრები „ქართული ოცნების“ ახალციხის შტაბის წარმომადგენლებმა ახალციხეშიც გამართეს.

„ქართული ოცნების“ ახალციხის შტაბი მოსახლეობასთან შეხვედრებს აგრძელებს, დღეს შევხვდით აგარისა და აწყურის მოსახლეობას. გვაქვს ინფორმაცია, რომ საკმაოდ ბევრი ადამიანი მხარს უჭერს ჩვენ პოლიტიკურ მიმართულებებს და აზრებს. გარდა ამისა, ჩვენ შეხვედრებს სხვა დატვირთვაც აქვს, გვინდა, რომ მოსახლეობამ გაიგოს გიორგი მარგველაშვილის ვიზიტის შესახებ და მოვუწოდებთ, მობრძანდნენ და გაესაუბრონ ჩვენი პრეზიდენტობის კანდიდატს“, - ამბობს „ქართული ოცნების“ ახალციხის შტაბის აქტივის კოორდინატორი გოჩა პარუნაშვილი.

12 სქტემბერს, გიორგი მარგველაშვილი მოსახლეობასთან შეხევდრას ახალციხის ცენტრალურ პარკში, მესხეთის სახელმწიფო დრამატული თეატრის მიმდებარე ტერიტორიაზე, 13:00 საათზე გამართავს. „ქართული ოცნების“ პრეზიდენტობის კანდიდატთან ერთად ახალციხეში სოფლის მეურნეობისა და ენერგეტიკის მინისტრსაც ელოდებიან.

„გარდა ამისა, ჩამოვლენ სხვა პოლიტიკოსები, მსახიობები და ხელოვნების მუშაკები. მოსახლეობას მოვუწოდეთ, რომ მოვიდნენ შეხვედრაზე და საკუთარი პრობლემები პირადად მოახსენონ ბატონ მარგველაშვილს“, - ამბობს მალხაზ ჟუჟუნაძე.

ადგილობრივები ამბობენ, რომ პრეზიდენტობის კანდიდატთან შეხვედრის დროს მის დაპირებებს და სამომავალო გეგმებს მოისმენენ, რაც მათ საშუალებას მისცემს საპრეზიდენტო არჩევნებზე სწორი არჩევანი გააკეთონ.

„მე მჯერა ბატონი ბიძინა ივანიშვილის, მის მიერ დასახელებული კანდიდატის. მხარს ვუჭერ ბატონ გიორგი მარგველაშვილს და ვეცდები, რომ სხვებსაც ჩავუნერგო რწმენა, რომ იგი მოვა საქმიანი დაპირებებით და საქმესაც გააკეთებს. მჯერა, რომ გააერთიანებს საქართველოს, ამ გათითოკაცებულ ქვეყანას და ძალიან კარგი პრეზიდენტი იქნება“, - ამბობს სოფელ აწყურში მცხოვრები ჟუჟუნა გოგოლაური.

12 სექტემბერს დაგეგმილი აქციის შესახებ „ქართული ოცნების“ ახალციხის შტაბის აქტივისტები მოსაწვევებსაც არიგებენ.

„დაახლოებით მაინც გვინდა, რომ ვიცოდეთ რა რაოდენობის მხარდამჭერები გვეყოლება და გარკვეული პოლიტიკური პროგნოზი გავაკეთოთ. ჩვენ საარჩევნო შტაბში 3,000 მხარდამჭერია გაწევრიანებული და კიდევ ბევრს აქვს ამის სურვილი“, - ამბობს მალხაზ ჟუჟუნაძე.