"ოცნება" სომხური სამოციქულო ეკლესიის წარმომადგენლებს შეხვდა

შეხვედრა ახალციხის ისტორიულ უბანში, რაბათში მდებარე სომხურ სამოციქულო ეკლესიაში შედგა.

„არჩევნებამდე რამდენიმე დღეა დარჩენილი, ამიტომ ჩვენ მოვიწვიეთ „ქართული ოცნების“ წარმომადგენლები, რომ გავიგოთ მათი გეგმები. საერთოდ, ეკლესია პოლიტიკაში არ ერევა, მაგრამ რაც არ უნდა იყოს, ჩვენი ქვეყნის ბედი წყდება და ყველამ სწორი არჩევანი უნდა გავაკეთოთ. იმისთვის, რომ ხვალ ყველამ დაინახოს ძლიერი, ერთიანი, განვითარებული საქართველო“, - ამბობს სომხური სამოციქულო ეკლესიის წინამძღვარი მამა აკოფი.

მისივე თქმით, სომხური სამოციქულო ეკლესიის წარმომადგენლები შეხვედრებს სხვა პოლიტიკური პარტიის წარმომადგენლებთანაც მართავენ. რამდენიმე დღის წინ ეკლესიას პრეზიდენტობის ერთ-ერთი კანდიდატი ზურაბ ხარატიშვილი სტუმრობდა.

„დღეს ყველა ხედავს ქვეყნის წინსვლას და ხალხმა სწორი არჩევანი უნდა გააკეთოს სახელმწიფოს განვითარებისთვის“, - ამბობს სომხური სამოციქულო ეკლესიის სამრევლო საბჭოს თავმჯდომარე გევორქ აკოფიანი.

„მოგეხსენებათ, რომ მამა აკოფი ბოლო ერთი კვირის განმავლობაში საქართველოში არ იმყოფებოდა. დღეს დილით ჩამოვიდა, გზიდანვე დამირეკა, რომ სურდა ჩვეთან შეხვედრა. მოგვიწვია, ვისაუბრეთ ჩვენს ურთიერთობებზე, ჩვენს დამოკიდებულებაზე სომხური ეროვნების წარმომადგენლებთან. ჩემგან, როგორც „ქართული ოცნების“ შტაბის ხელმძღვანელისაგან გაჟღერდა ასეთი ფრაზა, რომ ჩვენთვის, არ აქვს განსხვავება რელიგიურ მრწამსს, ჩვენ საზოგადოებას სხვადასხვა რელიგიური წარმომავლობის მიხედვით არ ვყოფთ“, - განაცხადა „ქართული ოცნების“ ახალციხის შტაბის უფროსმა მალხაზ ჟუჟუნაძემ.

შეგახსენებთ, რომ 13 ოქტომბერს „ქართული ოცნების“ ახალციხის შტაბის წევრები, სამომავლო გეგმების გაცნობის მიზნით, ახალციხისა და ტაო-კლარჯეთის მიტროპოლიტს მეუფე თეოდორესაც შეხვდნენ.

[თამარ თოთაძე, ახალციხე]