„ოცნების“ ახალგაზრდული ფრთის სამომავლო გეგმები (R)

„ოცნებას“ ახალგაზრდული ფრთის წარმომადგენლების 3-კაციანი ჯგუფი თითქმის ყველა მუნიციპალიტეტში ჰყავს. როგორც „ქართული ოცნების“ ახალციხის შტაბის ახალგაზრდული ფრთის თავმჯდომარე ზვიადი ნადირაძე ამბობს, კოალიციას ბევრი ახალგაზრდა უერთდება: „ძალით არავის ვაწევრიანებთ, ვისაც სურვილი აქვს ყველას შეუძლია ჩვენთან მოსვლა“.

„ქართული ოცნების“ ახალციხის შტაბის უფროსის მალხაზ ჟუჟუნაძის თქმით, რეგიონში „ქართული ოცნების“ მხარდამჭერების რაოდენობამ 5 000 გადააჭარბა, აქედან მეხუთედი სწორედ ახალგაზრდული ფრთის წარმომადგენლები არიან.

„ხალხი წინა ხელისუფლების მიერ ისეთი დაშინებული იყო, რომ ოპოზიციაში ყოფნის დროს არავინ გვეკარებოდა. ვღებულობთ ყველა ადამიანს, ვისაც ჩვენთან ერთად ყოფნის სურვილი აქვს, თუნდაც ის „ნაციონალების“ ყოფილი მხარდამჭერი იყოს, კარს არავის მივუხურავთ. ასეთი დავალება გვაქვს მიღბული ცენტრალური შტაბიდან“, - ამბობს „ქართული ოცნების“ ახალციხის შტაბის უფროსი მალხაზ ჟუჟუნაძე.

ამ ეტაპზე „ოცნების“ ახალციხის შტაბის ახალგაზრდულ ფრთაში 300-მდე ახალგაზრდაა გაწევრიანებული. ზვიად ნადირაძის თქმით, გაწევრიანების სურვილს ძირითადად 18-დან 22 წლამდე ახალგაზრდები გამოთქვამენ.

„ამ ეტაპზე ახალგაზრდები ნაკლებად აქტიურობენ. დღეში მხოლოდ რამდენიმე ახალგაზრდა მოდის. შტაბის გახსნიდან პირველ კვირას კი ძალიან ბევრი ახალგაზრდა მოვიდა“,-ამბობს ნადირაძე.

ახალგაზრდული ფრთა წინასაარჩევნოდ აქტიურად მზადებას მომავალ კვირიდან იწყებს.

„როგორც მანამდე ვაკეთებდით ახლაც რუპორებით ვივლით უბნებში და ხალხს გაწევრიანებისკენ მოუწოდებთ, დავარიგებთ ბუკლეტებს და ბროშურებს, სადაც ჩვენი სამომავლო გეგმების შესახებ მოსახლეობა სრულ ინფორმაციას შეიტყობს“,-ამბობს ნადირაძე.

ახალგაზრდული ფრთა ახალციხეში სხვადასხვა კულტურული ღონისძიებების გამართვასაც გეგმავს.

„პარტიას სამომავლოდ დაგეგმილი აქვს რამდენიმე კონცერტის გამართვა ახალციხეში. ჩვენ შემოქმედებითი კოლექტივების მხრიდან მხადაჭერას ვგრძნობთ, ამიტომ ვგეგმავთ მათი დახმარებით სხვადასხვა ღონისძიებების გამართვას“, - აცხადებს ჟუჟუნაძე.

[sknews.ge]