ახალციხეში მაღაზია ”მესხური ბრენდი” გაიხსნა

თექის, კერამიკისა და თიხის ნაწარმის გარდა, მაღაზიაში ორი სახეობის მესხური ღვინოც იყიდება, რომელსაც მაღაზიის დამფუძნებლები თავად აწარმოებენ. ნათენაძეებმა მესხური ღვინის ჩამოსხმა 2009 წელს დაიწყეს. მას შემდეგ, წელიწადში დაახლოებით 900-დან 1 000 ბოთლამდე ასხამენ.

- ”გარდა იმისა, რომ ვაწარმოებთ მესხურ ღვინოს, გვაქვს ტურისტული სააგენტოც. ყოველთვის გვინდოდა, რომ მესხური ნაწარმი წარმოგვეჩინა და ბაზარზე გაგვეტანა. ამის საშუალება არ მოგვეცა და ამიტომ გავხსენით საკუთარი მაღაზია”, - განმარტავს მაღაზია ‘მესხური ბრენდის’ ერთ-ერთი დამფუძნებელი გიორგი ნათენაძე.

მაღაზიაში წარმოდგენილი იქნება ხელნაკეთი ნივთებიც, რომლებზეც სამხატვრო სკოლის პედაგოგები და მოსწავლეები მუშაობენ. მაღაზიის დიზაინი, ხის მაგიდები, კასრები და სხვა ხის აქსესუარები უჩა გოგოლაძეს ეკუთვნის.

- ”წარმოდგენილი გვაქვს ადგილობრივი თექა, არაჩვეულებრივი კომპოზიციებით”, - ამბობს მაღაზია ”მესხური ბრენდის” ერთ-ერთი დამფუძნებელი და სამხატვრო სკოლის დირექტორი ნანა ნათენაძე.

”მესხური ბრენდი” კიდევ ერთ მაღაზიას გაზაფხულზე ახალციხის ციხის ტერიტორიაზე გახსნის. მაღაზია ტურისტებზე და ციხის დამთვარიელებლებზე იქნება გათვლილი.

- ”ეს ორი მაღაზია ტურისტებისა და ახალციხელებისთვის კარგი ადგილი იქნება, სადაც ადგილზე დამზადებულ სუვენირებს, ორი სახეობის მესხურ, ადგილობრივი ჯიშის ღვინოს შეიძენენ. ასევე წარმოდგენილი იქნება სხვადასხვა ქართული კომპანიების ღვინოებიც და სხვა ალკოჰოლური სასმელები“, - ამბობს გიორგი ნათენაძე.

ნანა ნათენაძის თქმით მაღაზიაში პროდუქცია კიდევ დაემატება. გარდა ამისა, იმ მოქალაქეებს ვინც აღნიშნული ხელსაქმითაა დაკავებული, შეუძლიათ მაღაზიის დამფუძნებლებს მიაკითხონ და თავიანთი პროდუქცია ჩააბარონ.

ამ ეტაპზე მესხური ღვინო, რომელიც 2009 წელშია ჩამოსხმული, 55 ლარი ღირს. სხვა კომპანიების ჩამოსასხმელი ღვინის ფასი 3,50 ლარიდან, ბოთლის ღვინის ფასი კი7 ლარიდან იწყება.



[თამარ თოთაძე, ახალციხე]