ბურჯანაძე: 'ოცნება' და 'ნაციონალები' გარიგებული არიან'

ნინო ბურჯანაძის განცხადებით, ეს გარიგება საარჩევნო კომისიებში ხდება: „მათი მთავარი ამოცანაა არ დაუშვან ბურჯანაძის პრეზიდენტობა, რადგან იციან, ჩემი დანაპირები შესრულდება და „ნაციონალურ მოძრაობას“ დასაკარგი ნამდვილად ბევრი აქვს".

ეს განცხადება ნინო ბურჯანაძემ დღეს, 14 ოქტომბერს, მესხ ამომრჩეველთან გააკეთა.

ბურჯანაძის დასახვედრად შეკრებილი მოსახლეობის უმრავლესობა აცხადებდა, რომ მხარს იმიტომ უჭერს, რომ იმედი აქვთ იგი რუსეთთან ურთიერთობებს მოაწესრიგებს.

„ხალხისკენ არის, უნდა, რომ ხალხი კარგად იყოს, იმედი გვაქვს რომ რუსეთთან გზას გახსნის“, - ამბობს ახალციხელი ვაგინაკ კირაკოსიანი.

ახალციხეში ბურჯანაძის შტაბის უფროსის გაგა ივანიძის განცხადებით, რეგიონის მოსახლეობას ბურჯანაძის ვიზიტის შესახებ თავიანთი კოორდინატორების საშულებით შეატყობინეს.

„დღეს აქ ყველა ადამიანი საკუთარი სურვილითაა მოსული, ის ვისაც აქ ხედავთ, არის ოჯახიდან მინიმუმ ერთი ადამიანი. მათ უკან კიდევ დგას ჩვენი ამომრჩეველი, ასე რომ, საქმე ჩვენს სასარგებლოდ არის“, - განაცხადა გაგა ივანიძემ.

შეგახსენებთ, ნინო ბურჯანაძე მესხეთს დღეს სტუმრობდა. დღესვე მან განაცხადა, რომ ივანიშვილს საკუთარი კანდიდატურა რომ წამოეყენებინა, მეტი მხარდაჭერა ექნებოდა, რადგან, 'მარგველაშვილი კარგი ბიჭია, თუმცა, მხოლოდ კარგი ბიჭობა ქვეყნის მართვას არ შველის. ბურჯანაძე ამომრჩეველს დაპირდა, რომ "დასავლეთთანაც შევინარჩეუნებთ კარგ ურთიერთობას და აღვადგენთ ურთიერთობებს რუსეთთანაც". დღესვე ნინო ბურჯანაძე ვანო მერაბიშვილის პატიმრობის საკითხსაც გამოეხმაურა.

[თამუნა უჩიძე, ახალციხე]